गुहागरात नऊ उमेदवारांचे 11 अर्ज वैध

गुहागरात नऊ उमेदवारांचे ११ अर्ज वैध
विक्रांत जाधव यांचाही अर्ज छाननीत बाद
गुहागर, ता. ३१ : गुहागर विधानसभा मतदारसंघासाठी १३ उमेदवारांनी १५ उमेदवारी अर्ज भरले होते. यामध्ये चार उमेदवारी अर्ज छाननीमध्ये बाद ठरले असून आता नऊ उमेदवारांचे अर्ज वैध ठरले. उमेदवारी अर्ज बाद झालेल्या उमेदवारांमध्ये विक्रांत भास्कर जाधव (उद्धवसेना), दीपक केशव शिगवण (अपक्ष), सुनील सुधीर काते (अपक्ष), सादिक मुनिरोदिन काझी (अपक्ष) यांचा समावेश आहे.
गुहागर विधानसभेसाठी ९ उमेदवारांचे ११ उमेदवार अर्ज वैध ठरले आहेत. यामध्ये उद्धव सेनेकडून २, महाराष्ट्र नवनिर्माण सेना १, शिंदे सेना १, राष्ट्रीय समाज पक्ष १, आरपीआय (आठवले) १ व अपक्ष ५ उमेदवारी अर्ज वैध ठरले आहेत. यामध्ये उद्धव सेनेकडून भास्कर भाऊराव जाधव, शिंदेसनेकडून राजेश बेंडल, प्रमोद गांधी (महाराष्ट्र नवनिर्माण सेना), हरी दिवा फडकले (अपक्ष), प्रमोद सीताराम आंब्रे (राष्ट्रीय समाज पक्ष), आरपीआय आठवले गटाकडून संदेश दयानंद मोहिते, संतोष जैयतापकर (अपक्ष), सुनील सखाराम जाधव, रामचंद्र गणपत पवार (अपक्ष) यांचे उमेदवारी अर्ज वैध ठरले आहेत.

विक्रांत जाधव यांचा
अर्ज का ठरला बाद
विक्रांत जाधव यांनी उद्धव ठाकरे शिवसेना या पक्षाकडून आमदार जाधव यांच्यासाठी डमी उमेदवारी अर्ज भरला होता. आमदार भास्कर जाधव यांचा उमेदवारी अर्ज वैध ठरल्याने विक्रांत जाधव यांचा डमी अर्ज बाद ठरला. त्यामुळे विक्रांत जाधव यांचा एबी फॉर्मवरील हक्क संपला. मग निवडणूक आयोगाच्या निर्देशानुसार त्यांच्याकडे अपक्ष उमेदवार म्हणून पाहिले गेले. अपक्ष म्हणून उमेदवारी अर्ज दाखल करताना सुचकांची संख्या १० असावी लागते. नोंदणीकृत मान्यता प्राप्त पक्षाला केवळ एक सूचक चालतो. विक्रांत जाधव यांचा अर्ज अपक्ष म्हणून गृहीत धरल्यावर सुचकांची संख्या कमी पडली. त्यामुळे त्यांचा अर्ज बाद झाला.