कार्यकर्त्यांच्या आर्थिक उन्नतीसाठी कोकणचे वाळवंट

समृद्ध कोकणचे आश्वासन उमेदवारी द्यावे

शहानवाज शहा ः कार्यकर्त्यांच्या उन्नतीसाठी वाळवंट

सकाळ वृत्तसेवा
चिपळूण, ता. ३१ : कोकणातील काही आमदारांनी आपल्या समर्थकांच्या आर्थिक उन्नतीसाठी कोकणचे वाळवंट करण्याची कोणतीही संधी सोडली नाही, अशी टीका येथील जलदूत शहानावाज शहा यांनी केली. निवडणूक जिंकायची असेल तर उमेदवारांनी कोकण संवर्धन व समृद्धीबाबत जनतेला लेखी आश्वासन द्यावे, अशी मागणीही त्यांनी केली आहे.
ते म्हणाले, कोकणातून यापूर्वी निवडून गेलेल्या आमदारांनी कोकणचा कॅलिफोर्नियाचे स्वप्न दाखविले. पण केला नाहीच. उलट विकासाच्या नावाखाली आपल्या कार्यकर्त्यांची आर्थिक उन्नती कशी होईल, कार्यकर्ते आर्थिक दृष्ट्या कसे सक्षम होतील हे आमदारांनी पाहिले. आता कोकणातील निवडणूक जिंकण्याची इच्छा ठेवणाऱ्या उमेदवारांनी कोकण संवर्धन व समृद्धीसाठी काही बाबी अधिकृत मुद्रांकावर मतदारांना लेखी लिहून दिल्या पाहिजेत. कोकणातील वृक्ष वाढविणारे व संवर्धन करणाऱ्या शेतकरी व नागरिकांना योग्य अभ्यास करून कार्बन क्रेडीट देणार, कोकणातील स्थानिक (परप्रांतीय नाही) वृक्षतोड कर्मचाऱ्यांना अन्य रोजगार व कामधंदा देऊन पुनर्वसन करणार, कोकण पट्ट्यात पूर्णपणे औद्योगिक वृक्ष तोड बंद करणार, लाडकी बहीण योजना हे सर्व बंद करून स्थानिक कोकणी लोकांना गाव जल, वन, कृषी पर्यटन समृद्ध करण्यासाठी सदरहू पैसा खर्च करून योग्यते नुसार रोजगार व व्यवसाय देणार, शासकीय खात्यामध्ये ४० वर्षाचा निवासी पुरावा असणाऱ्यांनाच ८० टक्के आरक्षण देणार, या मागण्या पूर्ण करणाऱ्यांचा निवडणुकीत मतदार विचार करतील.