ऐन दिवाळीत पावसाचा तडाखा

२२४१९
२२४२०
२२४२१

ऐन दिवाळीत पावसाने दाणादाण
भात भिजून शेतकऱ्यांचे नुकसान; गणेशगुळ्यातील वीजपुरवठा खंडित
सकाळ वृत्तसेवा
पावस, ता. ३१ ः अचानक आलेल्या मुसळधार पावसाने रत्नागिरीसह राजापूर तालुक्याला झोडपून काढले. ऐन दिवाळीत ढगांच्या गडगडाटासह विजांच्या तांडवामुळे नागरिकांमध्ये भीतीचे वातावरण होते. याचा सर्वाधिक फटका बळीराजाला बसला आहे. पावस (ता. रत्नागिरी) पंचक्रोशीत बुधवारी (ता. ३०) रात्री आणि गुरुवारी (ता. ३१) सायंकाळी सलग दोन दिवस पाऊस झाला. कापून ठेवलेले भात पावसात भिजल्यामुळे शेतकऱ्यांचे नुकसान झाले आहे. या परिसरातील वीजपुरवठा दिवसभर खंडित केला आहे. गणेशगुळे येथे फणसाच्या झाडावर वीज कोसळली. या पावसाने दिवाळी खरेदीसाठी बाहेर पडलेल्यांवर उत्साहावर विरजण फेरले.
मागील सात दिवस पावसाने विश्रांती घेतल्यामुळे भात कापणीला वेग आलेला होता, परंतु अचानक विजांचा कडकडाट व वादळी पाऊस आल्याने दुपारनंतर कापून ठेवलेले भात भिजून गेले. गणेशगुळे परिसरात वादळी पावसामुळे विद्युत तारा तुटून गेल्या. त्यामुळे वीजपुरवठा खंडित झाला होता. या परिसरात झाडे उन्मळून पडली असून, गुरुवारी दिवसभर वीजपुरवठा सुरळीत करण्याचे काम महावितरणकडून सुरू होते. आज सायंकाळी पुन्हा मुसळधार पावसाने पावस परिसराला झोडपले. एका फणसाच्या झाडावर वीज पडून नुकसान झाले आहे. अनेक ठिकाणची फळझाडे पडली आहेत. त्यामुळे अनेकांचे नुकसान झाले आहे. तसेच पावस जुईवाडी परिसर रस्त्यावर कोसळलेले झाड ग्रामस्थांनी बाजूला करत वाहतूक सुरळीत केली. सतत पडणाऱ्या पावसामुळे भात कापणी पुन्हा थांबली आहे. मागील चार दिवस पावसाने विश्रांती घेतल्यामुळे कापणीला वेग आला होता. आता पुन्हा खंड पडलेला आहे. दुपारी कापून ठेवलेले भात पावसात भिजले असून, त्याच्या लोंब्या पडून गेल्या आहेत. तालुक्यातील गावखडी परिसरात पाणथळीच्या जागेवरील भात कापणी थांबली आहे. पावस पंचक्रोशीसह रत्नागिरी शहरातही बुधवारी रात्री मुसळधार पाऊस पडला. त्यामुळे बाजारपेठेत खरेदीसाठी आलेल्या नागरिकांसह व्यापाऱ्यांची तारांबळ उडाली.