सिंधुदुर्गाला पावसाने पुन्हा झोडपले

N22528

सिंधुदुर्गाला पावसाने पुन्हा झोडपले
दिवाळी दिवशीच मुसळधारः सणाच्या आनंदावर विरजण
सकाळ वृत्तसेवा
वैभववाडी, ता. ३१ ः विजांचा लखलखाट आणि जोरदार वाऱ्यासह जिल्ह्याच्या बहुतांशी भागाला आज सायंकाळी मुसळधार पावसाने झोडपून काढले. दिवाळीच्या पहिल्याच दिवशी जोरदार पाऊस झाल्यामुळे उत्साहावर पाणी पडले. भातपीक उत्पादकांची ससेहोलपट सुरूच असून, सततच्या पावसामुळे नुकसानीची तीव्रता देखील वाढत आहे. पावसामुळे अनेक भागातील वीजपुरवठा खंडित झाला.
जिल्ह्यात आज दुपारनंतर सर्वत्र पावसाच्या सरी बरसल्या. रात्री उशिरापर्यंत पाऊस सुरू होता. आज सकाळपासून ढगाळ वातावरण होते. वातावरणात प्रचंड उकाडा जाणवत होता. दुपारी तीन वाजल्यापासुन सावंतवाडी परिसरात विजांच्या गडगडाटासह पावसाला सुरुवात झाली. काही भागात हलक्या तर काही भागात मध्यम स्वरुपाच्या सरी कोसळल्या. त्यानंतर जिल्ह्यातील कुडाळ, कणकवली, वैभववाडी, देवगड, मालवण आणि वेंगुर्ले तालुक्यांत विजांच्या लखलखाटासह मुसळधार पावसाला सुरुवात झाली. सर्वच भागात दमदार पाऊस झाला. वैभववाडी आणि देवगड तालुक्यांच्या काही भागात पावसाचा जोर अधिक होता. दीड ते दोन तास पाऊस झाला. वैभववाडी आणि कणकवलीच्या पूर्वपट्टयात जोरदार वारे वाहत होते.
दिवाळीच्या पहिल्याच दिवशी मुसळधार पावसाने झोडपून काढल्यामुळे उत्साहावर विरजण पडले. अनेक बाजारपेठांमध्ये चार वाजल्यानंतर शुकशुकाट पाहायला मिळाला. भातपीक कापणी केलेल्या शेतकऱ्यांची धांदल उडाली. अनेक शेतकऱ्यांना सकाळपासून कापणी केलेल्या भातपिकांची आवराआवर करणे शक्य झाले नाही. त्यामुळे ते सर्व पीक पावसात भिजून नुकसान झाले. सतत पडणाऱ्या पावसामुळे जिल्ह्यातील भातपीक नुकसानीची तीव्रता वाढण्याची शक्यता आहे.

चौकट
आकाशकंदील भिजले पावसात
दिवाळीला घरांसमोर आकाशकंदील लावले जातात. याशिवाय व्यापारी वर्ग देखील दुकानाबाहेर कंदील लावतात. आज झालेल्या पावसामुळे अनेकांचे आकाशकंदील वाऱ्याने उडून गेल्याचे चित्र होते.

चौकट
हवामान विभागाचा तंतोतंत अंदाज
जिल्ह्यात सुरू असलेल्या पावसाचा अंदाज हवामान विभागाकडून तंतोतंत वर्तविला जात असल्याचे आज पुन्हा एकदा स्पष्ट झाले. हवामान विभागाच्या ग्रामीण कृषी मौसम सेवा मुळदे केंद्राच्यावतीने सावंतवाडी परिसरासह अन्य भागांत ३ वाजून ४५ मिनिटांनी विजांच्या लखलखाटांसह पावसाचा अंदाज दिला होता, त्याप्रमाणे जिल्ह्यात पाऊस कोसळला.