७० हजाराची वायर चोरणाऱ्याला अटक

वायर चोरणाऱ्याला अटक
चिपळूण, ता. १९ ः शहरालगतच्या कापसाळ येथे ठेवण्यात आलेले ७० हजार रुपये किमतीचे अॅल्युमिनिअमच्या वायरचे बंडल दुचाकीवरून चोरणाऱ्या दोघा चोरट्यांना गस्तीच्या पोलिसांनी रंगेहाथ पकडण्यात आले. शुक्रवारी रात्री हा प्रकार घडला. यामध्ये एका अल्पवयीन तरुणाचा समावेश असून, दुसरा चोरटा हा मूळचा उत्तरप्रदेश येथील आहे. पोलिसांनी वायरसह दुचाकी जप्त केली.
अबरार इकरार शेख (२१, सध्या-कपसाळ, मुळ-उत्तरप्रदेश) असे अटक केलेल्या तरुणाचे नाव आहे. या प्रकरणी ४० हजार रुपयांची दुचाकी पोलिसांनी ताब्यात घेतली आहे. याबाबतची फिर्याद विवेक वसंत भोजने (३४, कापसाळ) यांनी दिली. त्यानुसार तालुक्यातील कापसाळ जिल्हा परिषद शाळेच्या परिसरात विवेक भोजने यांनी ठेवलेले अॅल्युमिनिअम वायरचे बंडल अबरार व त्यांच्यासमवेत असलेला अल्पवयीन मुलगा दुचाकीवरून नेत होते. या वेळी गस्तीवर असलेल्या पोलिसांना संशय आला. त्यानुसार पोलिसांनी त्या दोघांना थांबवून त्यांची चौकशी केली असता सुरुवातीला त्या दोघांनी उलटसुलट उत्तरे दिली; मात्र पोलिसांनी त्यांची कसून चौकशी केल्यानंतर हा चोरीचा प्रकार पुढे आला.