चाकरमान्यांची कार ''रो-रो'' मधून कोकणात

लोगो
वेध गणेशोत्सवाचे

चाकरमान्यांच्या मोटारी ‘रो-रो’मधून कोकणात
कोकण रेल्वे ः २३ ऑगस्टपासून सेवा होणार सुरू
सकाळ वृत्तसेवा
रत्नागिरी, ता. २० ः मुंबई-गोवा महामार्गावर चौपदरीकरणाची रखडलेली कामे, वाहतूक कोंडी यामधून चाकरमान्यांचा प्रवास अडथळ्यांचा होत आहे. त्यांच्यासाठी कोकण रेल्वेने ‘रो-रो’ सेवेचा पर्याय निवडला आहे. प्रथमच प्रवाशांसाठी ‘कार ऑन ट्रेन’ ही अभिनव सेवा सुरू केली आहे. कोकण रेल्वेच्या या घोषणेमुळे मुंबईकर चाकरमान्यांना दिलासा मिळाला आहे. ही सेवा २३ ऑगस्टपासून सुरू होणार असून, त्यासाठीचे आरक्षण २१ जुलै २०२५ पासून खुले होणार आहे.
गेली अनेक वर्षे मालाने भरलेले ट्रक रेल्वे वॅगनवरून वाहून नेण्यासाठी ’रो-रो’ सेवेचा प्रयोग यशस्वी झाला आहे. त्याच धर्तीवर खासगी चारचाकी वाहनांसाठीही सुविधा उपलब्ध करून देण्यात आली आहे. त्यामुळे लांब पल्ल्याचा प्रवास कार चालवण्याच्या त्रासाशिवाय अधिक आरामदायी, सुरक्षित आणि आनंददायी होणार आहे. विशेषतः गणेशोत्सवाच्या गर्दीत हा पर्याय अत्यंत सोयीचा ठरणार आहे. पुढील महिन्यात सुरू होणाऱ्या या सेवेमध्ये प्रत्येक मोटारीसाठी ७ हजार ८७५ रुपये शुल्क भरावे लागणार आहे. तसेच मोटारीसोबत तिघांना वातानुकूलित डब्यात किंवा आरक्षित डब्यातून प्रवास करता येणार आहे. ही सेवा कोलाड (महाराष्ट्र) येथून २३ ऑगस्टपासून सुरू होणार असून, ११ सप्टेंबरपर्यंत सुरू राहील, असे कोरे प्रशासनाकडून सांगण्यात आले. यासाठी २१ जुलैपासून आरक्षण करावे लागणार आहे. तसेच आरक्षणाची अंतिम मुदत १३ ऑगस्ट राहील. या सेवेमुळे मुंबई-गोवा महामार्गावरील वाहतूक कोंडी आणि खराब रस्त्यांपासून सुटका होणार आहे. तसेच प्रवासाचा वेळ आणि इंधनाची बचतही होणार आहे. लांबच्या प्रवासात गाडी चालवण्याचा शारीरिक आणि मानसिक त्रास वाचणार आहे. ही सेवा रायगड जिल्ह्यातील कोलाड ते गोव्यातील वेर्णा या स्थानकांदरम्यान असेल. मोटारीसोबत केवळ तीन व्यक्तींना प्रवासाची परवानगी असेल.

कुठून कुठे धावणार ‘ट्रेन’
ही सेवा महाराष्ट्रातील रायगड जिल्ह्यातील कोलाड ते गोव्यातील वेर्णा दरम्यान उपलब्ध असेल. या सेवेची सुरुवात कोलाड (महाराष्ट्र) येथून २३ ऑगस्ट २०२५ पासून, तर वेर्णा (गोवा) येथून २४ ऑगस्ट २०२५ पासून होणार आहे.