जिल्ह्यात भविष्यात ‘एआय’चा वापर वाढवणार

79149

जिल्ह्यात भविष्यात ‘एआय’चा वापर वाढवणार

पालकमंत्री नीतेश राणे : जिल्हा परिषद कर्मचारी प्रशिक्षण वर्गाला भेट

सकाळ वृत्तसेवा
ओरोस, ता. २२ ः पुढील काळात आपल्याला सिंधुदुर्ग जिल्हा प्रशासनात ‘एआय’चा अधिक वापर करावयाचा आहे. त्यासाठी सर्वांनी एआयच्या माध्यमातून अधिक चांगले काम करावे, असे आवाहन पालकमंत्री नीतेश राणे यांनी जिल्हा परिषद कर्मचारी एआय प्रशिक्षण वर्गाला दिलेल्या भेटी प्रसंगी केले.
राज्यात पहिला ‘एआय’ जिल्हा होण्याचा अधिकृत मान मिळाल्यानंतर ‘एआय’ वापरात कर्मचारी पारंगत होण्यासाठी जिल्हा प्रशासनाने प्रशिक्षण वर्ग घेण्यास सुरुवात केली आहे. त्याच अनुषंगाने जिल्हा परिषदेचे मुख्य कार्यकारी अधिकारी रवींद्र खेबुडकर यांनी सिंधुदुर्गनगरी येथील जिल्हा परिषद शाळेत एआय प्रशिक्षण आयोजित केले आहे. यामध्ये जिल्हा परिषदेच्या प्रत्येक विभागातील दोन तंत्रस्नेहींची निवड करून त्यांना प्रशिक्षण देण्यात येत आहे.
जिल्हा दौऱ्यावर असलेल्या पालकमंत्री राणे यांनी सोमवारी (ता. २१) या प्रशिक्षण वर्गाला भेट दिली. सीईओ खेबुडकर, जिल्हा बँक अध्यक्ष मनीष दळवी, प्रमुख मार्गदर्शक श्री. वीरेंद, प्राथमिक शिक्षणाधिकारी गणपती कमळकर, उपशिक्षणाधिकारी शोभराज शेर्लेकर, कनिष्ठ प्रशासन अधिकारी विठोबा परब, जिल्हा समन्वयक महेश शिंगाडे आदी उपस्थित होते. या वर्गात पालकमंत्री राणे यांनी, स्वतः कर्मचारी दिवसभरात प्रशिक्षणामध्ये नेमके काय शिकत आहेत, याची कर्मचाऱ्यांजवळ जाऊन माहिती घेतली. पुढील काळात सिंधुदुर्ग प्रशासनात एआयचा अधिक वापर करावयाचा असल्याने सर्वांना अधिक चांगले काम करण्याच्या सूचना दिल्या.
----
प्रशिक्षणात दोन तंत्रस्नेही कर्मचारी
पालकमंत्री राणे यांचे सीईओ खेबुडकर यांनी स्वागत केले. या प्रशिक्षण वर्गाबाबत तसेच कर्मचाऱ्यांना कसे प्रशिक्षण दिले जात आहे व त्याचा प्रशासनात कसा वापर केला जाणार आहे, याबाबत थोडक्यात माहिती जिल्हा समन्वयक महेश शिंगाडे यांनी दिली. खेबुडकर यांनी या प्रशिक्षणामागील हेतू व उद्देश स्पष्ट केला. जिल्हा परिषदेतील सुरुवातीला प्रत्येक विभागातील दोन तंत्रस्नेही कर्मचारी या प्रशिक्षणासाठी घेतल्याचे सांगत त्यांना याबाबत प्रशिक्षण देऊन प्रशिक्षित केले जाणार आहे, असे स्पष्ट केले.