कणकवली : राणे, पाटबंधारे अधिकारी बैठक

kan181.jpg
N92341
कणकवलीः येथील कार्यक्रमात पालकमंत्री नितेश राणे यांनी विविध प्रलंबित समस्यांचा आढावा घेतला

नवीन कुर्ली वसाहतीच्या
विकासासाठी मी कटिबद्ध
नितेश राणेः प्रकल्‍पग्रस्त, पाटबंधारे अधिकारी आणि ग्रामस्थांची बैठक
कणकवली, ता. १८ः नवीन कुर्ली वसाहतीच्या सर्वांगीण विकासासाठी मी कटिबद्ध आहे. आता तुमचा आमदार पालकमंत्री झाला आहे, त्यामुळे तुमच्या सर्व मागण्या समाधानकारक पूर्ण होतील, असा विश्वास मंत्री नितेश राणे यांनी ग्रामस्थांना दिला.
नवीन कुर्ली गावातील प्रलंबित मागण्यांवर तोडगा काढण्यासाठी पालकमंत्री राणे यांनी प्रकल्पग्रस्त व अधिकारी यांची संयुक्त बैठक घेतली. १३ नागरी सुविधा ग्रामस्थांना कशा देता येतील यावर या बैठकीत सविस्तर चर्चा झाली. या बैठकीला पाटबंधारे विभागाचे प्रमुख अधिकारी श्री. पाटील, श्री. मंगले, राजेंद्र कोलते, सूर्यकांत वारंग, मनोज रावराणे उपस्थित होते.
बैठकीच्या सुरुवातीला मनोज रावराणे यांनी १३ नागरी सुविधांमधील प्रलंबित प्रश्नांची माहिती दिली. त्यावर कार्यकारी अभियंता श्री.मंगले यांनी आवश्यक २.५० कोटींची प्रापणसूची मंजूर झाल्याचे सांगितले. आणखी निधीसाठीही प्रस्ताव दिला असल्याचे त्यांनी स्पष्ट केले.
स्थानिक प्रश्न मांडताना रावराणे यांनी सातबाऱ्यावर ‘नवीन कुर्ली-लोरे’ व ‘नवीन कुर्ली-फोंडा’ अशी नावे येत असून ती केवळ ‘नवीन कुर्ली’ अशी दुरुस्त करण्याची मागणी केली. व्यापारी भूखंड वाटप व शेतजमिनींच्या प्रश्नांवरही त्यांनी लक्ष वेधले. त्यावर राणे यांनी अधिकाऱ्यांना खास बाब म्हणून प्रस्ताव तयार करून पाठविण्याच्या सूचना दिल्या व मंत्रालयीन पातळीवर तोडगा काढण्याचे आश्वासन दिले.
रस्ते बांधकामासाठी पाटबंधारे विभागाने ‘ना हरकत’ प्रमाणपत्र द्यावे, जिल्हा परिषदेमार्फत रस्त्यांची कामे पूर्ण केली जातील, असेही राणे यांनी स्पष्ट केले. याशिवाय वसाहतीसाठी उपकेंद्र, गावाची हद्द निश्चिती आणि इतर मूलभूत सोयींवर मंत्रालयीन स्तरावर प्रयत्न केले जातील, असे सांगून एका महिन्यात प्रश्न मार्गी लावण्याच्या सूचना त्यांनी अधिकाऱ्यांना दिल्या.