''ॲग्री स्टॅक''वरुन आचरेवासिय आक्रमक

swt1838.jpg
92498
आचराः येथे मुख्यमंत्री समृद्ध पंचायत राज अभियानांतर्गत झालेल्या ग्रामसभेत उपस्थितांना मार्गदर्शन करताना मान्यवर.

‘ॲग्री स्टॅक’वरुन आचरेवासिय आक्रमक
इनाम जमिन कुळ प्रश्नः ग्राम महसूल अधिकाऱ्यांकडून कार्यवााहीची ग्वाही
सकाळ वृत्तसेवा
आचरा, ता. १८ः येथे आज झालेल्या ग्रामसभेत गावातील इनाम जमिनीमुळे कुळ असलेल्या बहुतांशी ग्रामस्थांचे ॲग्री स्टॅक होत नसल्याच्या मुद्द्यावर ग्रामस्थ आक्रमक झाले. कसवटदार शेतकरी शासकीय योजनांपासून वंचित राहतील, या भीतीने ग्रामस्थांनी ग्राम महसूल अधिकाऱ्यांना धारेवर धरत सक्षम अधिकाऱ्यांना बोलावण्याची मागणी केली. सरपंच जेरॉन फर्नांडिस यांनी याबाबत ग्रामपंचायत ठरावाद्वारे जिल्हाधिकारी यांचे लक्ष वेधण्याचे तसेच ग्राम महसूल अधिकारी श्रीमती शिरसाट यांनी वरिष्ठांना तातडीने अहवाल सादर करत वंचित ग्रामस्थांना लाभ मिळवून देण्यासाठी प्रयत्न करण्याच्या निर्णयानंतर हा विषय स्थगित करण्यात आला.
मुख्यमंत्री समृद्ध पंचायत राज अभियानांतर्गत आचरा ग्रामपंचायतीची विशेष ग्रामसभा सरपंच फर्नांडिस यांच्या अध्यक्षतेखाली झाली. यावेळी उपसरपंच संतोष मिराशी, ग्रामविकास अधिकारी पद्माकर कासले, ग्रामपंचायत सदस्य मुझफ्फर मुजावर, पंकज आचरेकर, महेंद्र घाडी, चंदू कदम उपस्थित होते. ग्रामस्थांसह महिलांची उपस्थिती लक्षणीय असल्याने मोकळ्या जागेत ही सभा घेण्यात आली. ग्रामविकास अधिकारी कासले यांनी माहिती दिली. त्यानंतर महसूल अधिकारी मौसमी शिरसाट ‘ॲग्री स्टॅक’विषयी माहिती देत असताना ग्रामस्थ अभिजित सावंत यांनी जमिनी बहुतांश कुळ वहिवाटीच्या असल्याने ॲग्री स्टॅक होत नसल्याचा मुद्दा उपस्थित केला.
खुद्द भोगवटा व घरभाटाची जमीन असलेल्या शेतकऱ्यांचेच ॲग्री स्टॅक होत असून उर्वरितांची नोंदणी होत नसल्याने ई-पीक, पीकविमा आणि अन्य योजनांपासून शेतकरी वंचित राहत असल्याचे सांगण्यात आले. शेतकऱ्यांचे नुकसान कोण भरून काढणार?, जिल्हाधिकाऱ्यांचे मार्गदर्शन का मागवले नाही? असे प्रश्न उपस्थित करत ग्रामस्थांनी महसूल अधिकाऱ्यांना धारेवर धरले.
योग्य माहिती मिळेपर्यंत सक्षम अधिकाऱ्यांना बोलावण्याची मागणी करण्यात आली. परिस्थिती तणावपूर्ण होताच सरपंच फर्नांडिस यांनी महसूल अधिकारी शिरसाट यांना वरिष्ठांकडे तातडीने अहवाल पाठविण्याच्या सूचना केल्या. तसेच ग्रामसभेत याबाबत ठराव करून जिल्हाधिकाऱ्यांकडे सादर करण्याचे जाहीर केले. त्यानंतर ग्रामस्थ शांत झाले; मात्र लवकर निर्णय न झाल्यास आंदोलनाचा इशारा त्यांनी दिला.