-शासकीय वैद्यकीय महाविद्यालयात

गुडघ्याची यशस्वी दुर्बिणी शस्त्रक्रिया
मुंबई–पुण्याएवढी दर्जेदार सुविधा आता रत्नागिरीत
सकाळ वृत्तसेवा
रत्नागिरी, ता. २४ : शासकीय वैद्यकीय महाविद्यालय व रुग्णालय रत्नागिरी येथे पायाच्या गुडघ्याची गुंतागुंतीची यशस्वी शस्त्रक्रिया करण्यात आली. रोहित मेने असे शस्त्रक्रिया झालेल्या रुग्णाचे नाव आहे.
गेले दीड वर्षापासून त्यांच्या उजव्या पायाच्या गुडघ्याची शिर आणि गादी तुटल्यामुळे गुडघेदुखीचा त्रास होता. गुडघा अडकलेला असल्याने सरळ करता येणे शक्य नव्हते शिवाय चालताना तोल जाऊन लंगडत चालावे लागत होते. ही शस्त्रक्रिया खासगी रुग्णालयात करणे खर्चिक असल्याने हा रुग्ण शासकीय वैद्यकीय महाविद्यालय व रुग्णालय रत्नागिरी येथे उपचाराकरिता दाखल झाले. १४ ऑक्टोबरला अस्थिरोगतज्ज्ञ डॉ. निखिल देवकर यांनी रोहित मेने यांच्या उजव्या गुडघ्याची दुर्बिणीद्वारे शस्त्रक्रिया यशस्वीरीत्या केली. या शस्त्रक्रियेमुळे अडकलेला गुडघा पूर्ववत झाला. तोल न जाता चालणे शक्य झाले आहे.
दुर्बिणीद्वारे केली जाणारी अवघड व खर्चिक अशी शस्त्रक्रिया जी मुंबई, पुणेसारख्या मोठ्या शहरात केली जाते, ती शस्त्रक्रिया शासकीय वैद्यकीय महाविद्यालय व रुग्णालय रत्नागिरी येथे यशस्वीरीत्या करण्यात आली. त्याबद्दल अधिष्ठाता डॉ. जयप्रकाश रामानंद, उपवैद्यकीय अधीक्षक डॉ. सुतार, अस्थिरोगतज्ज्ञ डॉ. निखिल देवकर, भूलतज्ज्ञ डॉ. मंगला चव्हाण तसेच कर्मचारी यांचे रोहित मेने व त्यांच्या कुटुंबाने आभार मानले व मिळालेल्या सेवेबद्दल समाधान व्यक्त केले.