विजेच्या लपंडावामुळे आचरावासीय हैराण

विजेच्या लपंडावामुळे
आचरावासीय हैराण

सकाळ वृत्तसेवा
आचरा, ता. २५ ः आचरा गावात दोन दिवसांपासून विजेचा लपंडाव सुरू असून, नागरिकांचे दैनंदिन जीवन विस्कळीत झाले आहे. गुरुवारपासून (ता. २३) वारंवार वीजपुरवठा खंडित होत आहे. या सततच्या समस्येमुळे ग्रामस्थ व व्यापाऱ्यांमधून संताप व्यक्त केला जात आहे.
वीज गेल्यावर २ ते ३ तास गायब होत आहे. ऐन दिवाळीत विजेचा लपंडाव चालू असल्यामुळे व्यापारी ग्राहक, गृहिणींना त्रास सहन करावा लागत आहे. घरगुती कामे, ऑनलाईन शिक्षण तसेच व्यवसायांवर मोठा परिणाम झाला आहे. गुरुवारी सायंकाळच्या वेळेस वीजपुरवठा खंडित झाल्याने गाव अंधारात बुडला होता. भाऊबीजसाठी ग्रामस्थ बाहेर पडलेले असताना रस्ते अंधारमय असल्यामुळे वाहतूक आणि पादचारी यांचीही गैरसोय झाली. वारंवार होणाऱ्या या वीज समस्येबाबत तीव्र नाराजी व्यक्त होत आहे. दर तासाला वीज जाते. त्यामुळे मोबाईल चार्जिंग, पाणी पंप सुरू ठेवणे अशक्य झाले आहे. व्यापारी वर्गाचे अतोनात नुकसान झाले आहे. व्यापाऱ्यांच्या आईस्क्रीम वितळले आहेत, तर हॉटेल व्यावसायिकांच्या भाज्या खराब झाल्या आहेत, इलेक्ट्रॉनिक व्यवसायावरही परिणाम झाला आहे. ऑनलाईन कामे रखडली आहेत.