-''त्या'' प्रभागातील जागा भाजपला सोडा

‘त्या’ प्रभागातील जागा भाजपला सोडा
अल्पसंख्याक जिल्हाध्यक्ष खान ; बंडखोरीची शक्यता
सकाळ वृत्तसेवा
रत्नागिरी, ता. १२ : शिवसेना-भाजप युती करताना शहरातील अल्पसंख्याक मोहल्ल्यात असलेल्या ५ प्रभागातून भाजपासाठी जागा सोडावी, यासाठी भाजपच्या अल्पसंख्याक मोर्चाच्या जिल्हाध्यक्षांकडून प्रयत्न सुरू आहेत. मिरकरवाडा प्रभाग क्र. १३, राजिवडा प्रभाग क्र. ८, १५, १६, कोकणनगर प्रभाग क्र. ४ या प्रभागातील जागा भाजपला मिळाल्या नाहीत तर बंडखोरी होण्याची भीती अल्पसंख्याक जिल्हाध्यक्ष अब्दुल बिजली खान यांनी व्यक्त केली.
मुस्लिमबहुल प्रभागांतून भाजपला उमेदवारी मिळावी यासाठी अल्पसंख्याक मोर्चा जिल्हाध्यक्षांनी भाजपचे शहराध्यक्ष पर्शुराम उर्फ दादा ढेकणे यांच्याकडे त्या संदर्भात पत्रही दिले आहे. शहराध्यक्षांनी हे पत्र वरिष्ठ नेत्यांकडे पाठवले असल्याचे सांगितले. अल्पसंख्याक मोहल्ले असलेल्या प्रभागांमध्ये भाजपचे उमेदवार पूर्ण ताकदीने लढतील, असा विश्वासही जिल्हाध्यक्षांनी पत्राद्वारे व्यक्त केला आहे. त्यामुळे शिवसेना-भाजप युतीच्या राजकारणातील घडामोडींना वेग आला आहे. रत्नागिरी पालिकेच्या सार्वत्रिक निवडणुकीत शिवसेना-भाजप युती निश्चित झाली आहे. पालकमंत्री उदय सामंत यांनी शिवसेना-भाजप युती यापूर्वीच जाहीर केली आहे; परंतु भाजपकडून अद्याप कोणतीही अधिकृत घोषणा झालेली नाही.