रत्नागिरी-तिसऱ्या दिवशी दोन उमेदवारी अर्ज दाखल

तिसऱ्या दिवशी दोन उमेदवारी अर्ज दाखल
रत्नागिरी पालिका निवडणूक; राजन शेट्येंच्या प्रभागातून अर्ज
सकाळ वृत्तसेवा
रत्नागिरी, ता. १२ : रत्नागिरी पालिकेच्या पंचवार्षिक निवडणुकीसाठी अर्ज भरण्याच्या तिसऱ्या दिवशी म्हणजे आज २ उमेदवारांनी अपक्ष उमेदवारी अर्ज दाखल केले. प्रभाग तीनमध्ये सर्वसाधारण जागेसाठी हे उमेदवारी अर्ज दाखल झाले आहेत. शिवसेनेचे ज्येष्ठ नेते राजन शेट्ये यांच्या प्रभागातून हे उमेदवारी अर्ज भरण्यात आले आहे.
निवडणुकीसाठी प्रभाग क्र. ३ मधून मतीन बावानी व हीना बावानी या दाम्पत्याने दोन उमेदवारी अर्ज अपक्ष म्हणून दाखल केला आहे. दरम्यान, ते राष्ट्रवादी शरद पवार पक्षाचे उमेदवार असू शकतात, अशी चर्चा पालिका वर्तुळात सुरू आहे. उमेदवारी अर्ज भरण्याच्या तिसऱ्या दिवशी आज प्रभाग ३ ब मधून सर्वसाधारण आरक्षण असलेल्या गटात मतीन याकुब सत्तार बावानी व ३ ब मधूनच हीना मतीन बावानी यांनी उमेदवारी अर्ज दाखल केला आहे.
पालिका निवडणुकीसाठी प्रथमच उमेदवारी अर्ज दाखल झाले आहेत. निवडणूक निर्णय अधिकारी जीवन देसाई यांच्याकडे या दाम्पत्याने अर्ज सादर केला. तत्पूर्वी त्यांनी ऑनलाईन प्रक्रिया पूर्ण केली. प्रभाग ३ हा शिवसेनेचे नेते राजन शेट्ये यांचा प्रभाग असून, त्यांचे या ठिकाणी मोठे वर्चस्व दिसून येते. याच प्रभागात बावानी दाम्पत्याने अर्ज दाखल केला आहे. बावानी दाम्पत्य हे आघाडीकडून राष्ट्रवादी शरद पवार गटाचे उमेदवार असू शकतात, अशी चर्चा सुरू आहे.