नारायण राणेंवर अँजिओप्लास्टी

केंद्रीय मंत्री नारायण राणे
यांच्यावर अँजिओप्लास्टी
सकाळ वृत्तसेवा
मुंबई, ता. २७ ः केंद्रीय मंत्री नारायण राणे यांना रुग्णालयात दाखल करण्यात आले आहे. मिळालेल्या माहितीनुसार, त्यांना हृदयाचा त्रास उद्‍भवू लागल्याने वांद्रे येथील लीलावती रुग्णालयात दाखल केले. लीलावती रुग्णालयाच्या डॉ. जलील पारकर यांनी दिलेल्या माहितीनुसार, त्यांच्यावर अँजिओप्लास्टी करण्यात आली आहे. यानंतर काही दिवस त्यांना रुग्णालयात डॉक्टरांच्या देखरेखीखाली ठेवण्यात येईल.
डॉ. पारकर यांच्या माहितीनुसार, नारायण राणे यांना काही दिवसांपूर्वी लीलावती रुग्णालयात दाखल करण्यात आले होते. राणे नियमित तपासणीसाठी लीलावती रुग्णालयात आले होते. या वेळी अँजिओग्राफी करण्यात आली असता काही ब्लॉक आढळले होते. यानंतर आज त्यांच्यावर अँजिओप्लास्टी करण्यात आली. ‘लीलावती’तील डॉ. मॅथ्यू यांनी ही अँजिओप्लास्टी केल्याचे रुग्णालयाकडून सांगण्यात आले. राणे यांची प्रकृती सध्या स्थिर असून, त्यांना दोन दिवस विश्रांतीचा सल्ला देण्यात आला असल्याचेही डॉक्टरांनी सांगितले. तसेच, यापूर्वी २००९ मध्ये नारायण राणे यांच्यावर अँजिओप्लास्टी करण्यात आली होती. ही अँजिओप्लास्टी लीलावती रुग्णालयातच करण्यात आली असल्याचेही सांगण्यात आले.