खारमध्ये सापडले नवजात अर्भक

मुंबई, ता. २३ : मुंबईतील खार पश्चिम भागात मेट्रोच्या कामासाठी ठेवण्यात आलेल्या पाईपमध्ये नवजात अर्भक आढळून आले आहे. भाभा रुग्णालयात त्याच्यावर उपचार सुरू आहेत. या प्रकरणी खार पोलिसांनी अज्ञात व्यक्तीविरोधात गुन्हा दाखल केला आहे.
खारमध्ये मेट्रोचे काम सुरू असून तिथे मोठे पाईप ठेवण्यात आले आहेत. आज सकाळी कामगार नेहमीप्रमाणे कामावर आले असता त्यांना तिथे एक अर्भक आढळले. खार पोलिस ठाण्याच्या उपनिरीक्षक शीतल मेंडगे यांनी अर्भकाला भाभा रुग्णालयात दाखल केले. त्याची प्रकृती स्थिर आहे. पुढील तपास खार पोलिस करत आहेत.