ओमिक्रॉन पुन्हा डोके वर काढतोय!

ओमिक्रॉन डोके वर काढतोय
मुंबई : मुंबईत पुन्हा एकदा ओमिक्रॉन डोके वर काढत असल्याचे एकंदरीत महापालिकेने केलेल्या जिनोम सिक्वेन्सिंगच्या अहवालावरून स्पष्ट होत आहे. आतापर्यंत ९९.६३ टक्के नमुन्यांमध्ये ओमिक्रॉन सापडला आहे. त्यामुळे प्रशासन सतर्क झाले आहे, पण नागरिकांनीही सर्वाधिक खबरदारी घ्यावी, असे आवाहन प्रशासनाने केले आहे. त्यातच जिनोम सिक्वेन्सिंगच्या अहवालातून वारंवार लसीकरणाचे महत्त्व अधोरेखित होत आहे. महापालिकेच्या १३ व्या जिनोम सिक्वेन्सिंग अभ्यासातून असे दिसून आले होते, की बाधित रुग्णांपैकी ४० टक्के लसीकरण न केलेले होते. त्यापैकी तीन रुग्णांचा मृत्यू झाला. महापालिकेने चौथी लाट सुरू झाल्यापासून म्हणजेच जानेवारी ते जूनदरम्यान एकूण पाच जिनोम सिक्वेन्सिंग केले आहे. त्यातील आठव्या फेरीतील जिनोम सिक्वेन्सिंगच्या अहवालातून ओमिक्रॉनने ८९ टक्के डेल्टाची जागा घेतल्याचे निदर्शनास आले होते.