अनधिकृत बांधकामावर वेंगुर्लेत हातोडा

वेंगुर्ले (सिंधुदुर्ग) - येथील ग्रामीण रुग्णालया नजिकच्या इमारतीवरील अनधिकृत दुसऱ्या मजल्याचे बांधकाम अखेर आज तोडण्यास सुरुवात झाली आहे. याठिकाणी दोन दिवसांपूर्वी काम करणाऱ्या तरूणाचा विजेच्या धक्‍क्‍याने मृत्यू झाला. हा बळी गेल्यानंतर हे अनधिकृत बांधकाम उजेडात आले. हे तोडण्याचे काम सुरू असल्याने नगरपरिषदेने त्या भागातून जाणारी वाहतूक सायंकाळपर्यंत बंद ठेवली होती. 

शहरात बंदर रोडला लागून ग्रामीण रुग्णालयानजिक विनायक परब यांची इमारत आहे. तळमजला व पहिला मजला अशी दोन्ही बांधकामे झाल्यावर दुसऱ्या मजल्याचे बांधकाम अनधिकृतरित्या सुरू होते. दुसऱ्या मजल्याचे प्लॅस्टरींगचे काम करताना शहरातील शुभम बाळू इंदुलकर या युवकास इमारतीच्या बाजूने जाणाऱ्या 11 के.व्ही विद्युतभारित वाहिनीच्या विजेचा शॉक लागून नुकताच त्याचा मृत्यू झाला. या मृत्यूप्रकरणी त्याचे मामा जानू दत्तू तोडकर याने येथील पोलिसात दिलेल्या तक्रारीनुसार इमारत मालक विनायक परब व ठेकेदार तिलकराज गोंडा या दोघांवर गुन्हा दाखल झाला आहे. 28 तासानंतर त्या तरुणाचा मृतदेह नातेवाईकांच्या ताब्यात देण्यात आला. या दुर्घटनेमुळे शहरवासीयांकडून संताप व्यक्त होत होता. संबंधित अनधिकृत बांधकाम तात्काळ तोडून कारवाई करावी, अशी मागणी नागरिकांमधून होत होती. 

त्रास होऊ नये याची काळजी 
नगरपरिषद प्रशासनाने इमारत मालक परब यांना काल नोटीस देऊन हे अनधिकृत बांधकाम 24 तासात तोडावे, असे कळविले होते. आपल्याकडून तसे न झाल्यास नगरपरिषद ते बांधकाम तोडण्याचे स्पष्ट केले होते. नोटीस मिळताच आणखी नुकसान नको या भीतीने परब यांनी आज सकाळपासून ते अनधिकृत बांधकाम तोडण्यास सुरुवात केली. या भागातील नागरिकांना बांधकाम तोडताना कोणताही त्रास होऊ नये, यासाठी नगरपरिषद प्रशासनातर्फे हा रस्ता बंद करण्यात आला होता. 

संपादन - राहुल पाटील