कोकण - कोविड नियमांचे पालन करून वॉटरस्पोर्टस् सुरू होणार

मालवण : कोविड नियमांचे पालन करून जिल्ह्यातील वॉटरस्पोर्टस् सुरू करण्यास परवानगी देण्याचा निर्णय आज जिल्हाधिकारी कार्यालयात पालकमंत्र्यांच्या उपस्थितीत झालेल्या बैठकीत घेण्यात आला आहे. जिल्ह्यातील वॉटरस्पोर्ट सुरू करण्याबाबत पालकमंत्री उदय सामंत, जिल्हाधिकारी के. मंजुलक्ष्मी, आमदार वैभव नाईक, जिल्हा पोलिस अधीक्षक राजेंद्र दाभाडे, मेरीटाईम बोर्डाचे अधिकारी सुरज नाईक यांच्या प्रमुख उपस्थितीत जिल्हाधिकारी कार्यालयात आज बैठक पार पडली.

यावेळी कोविड नियमांचे पालन करून वॉटरस्पोर्टसला परवानगी देण्याचे बैठकीत ठरवण्यात आले. मेरीटाईम बोर्डने वॉटरस्पोर्टस् व्यावसायिकांना परवानग्या देऊन जिल्हाधिकार्‍यांनी त्यांना सहकार्य करण्याचे ठरवण्यात आले. याबाबतचा आदेश जिल्हाधिकारी लवकरच देतील अशी माहिती आमदार नाईक यांनी यावेळी दिली. यावेळी निवासी उपजिल्हाधिकारी दत्तात्रय भडकवाड, जिल्हा बँक अध्यक्ष सतीश सावंत, शिवसेना नेते संदेश पारकर, नगराध्यक्ष महेश कांदळगावकर, नगरसेवक मंदार केणी यांच्यासह अन्य अधिकारी उपस्थित होते.