बात्रा, मेहतांच्या निवडीवर शिक्कामोर्तब

नवी दिल्ली - न्यायालयाने भारतीय ऑलिंपिक संघटनेच्या निवडणुकीत हस्तक्षेप करण्यास नकार दिल्यानंतर आंतरराष्ट्रीय हॉकी महासंघाचे अध्यक्ष नरिंदर बात्रा आणि सचिव राजीव मेहता यांच्या सरचिटणीसपदावर गुरुवारी अधिकृत शिक्कामोर्तब झाले. 

यानंतरही दिल्ली उच्च न्यायालयाने ‘आयओए’ च्या निवडणुकीसंदर्भात प्रलंबित असलेल्या याचिकेच्या निर्णयावर या निवडणुकीच्या निकालाचे भवितव्य अवलंबून असेल, अशी टिप्पणी जोडल्यामुळे सदस्यांच्या बिनविरोध निवडीवरील अनिश्‍चितता कायम राहिली आहे. 

‘आयओए’च्या आज येथे पार पडलेल्या वार्षिक सर्वसाधारण सभेतील निवडणुकीत या दोघांची निवड झाली. बात्रा प्रथमच ‘आयओए’चे अध्यक्षपद भूषवतील, तर मेहता सलग दुसऱ्यांदा सरचिटणीसपद सांभाळतील. आनंदेश्‍वर पांडे ‘आयओए’चे नवे खजिनदार असतील.

क्रीडा क्षेत्रातील कार्यकर्ता राहुल मेहरा यांनी क्रीडा आचारसंहितेचा भंग होत असल्याने ‘आयओए’ची निवडणूक स्थगित करावी याबाबत दिल्ली उच्च न्यायालयात याचिका दाखल केली होती. या याचिकेवरील सुनावणी अजून प्रलंबित आहे. त्यावर अजून निर्णय झालेला नाही. ‘आयओए’च्या निवडणुकीत आम्हाला हस्तक्षेप करायचा नाही. त्यांनी निवडणुकीची कार्यवाही पूर्ण करावी; मात्र या यचिकेवरील सुनावणीनंतर होणाऱ्या अंतिम निर्णयावर या निवडणुकीचे भवितव्य अवलंबून असेल अशी टिप्पणीही न्यायालयाने दिल्यामुळे ‘आयओए’च्या निवडणुकीबाबतची अनिश्‍चितता कायम राहिली आहे.