IND vs NZ: अंतिम सामन्यातील संघात बदल होणार नाही, Abhishek Nayar स्पष्टच म्हणाले

IND vs NZ 3rd test: न्यूझीलंडविरुद्धची मालिका गमावलेली असली तरी शुक्रवारपासून सुरू होणारा तिसरा कसोटी सामना तेवढाच महत्त्वाचा आहे. वेगवान गोलंदाज जसप्रीत बुमराबाबत भारतीय संघ व्यवस्थापन वर्कलोडबाबत सावध आहे. संघातील सर्व खेळाडूंनी या सामन्याच्या तयारीसाठी सराव केला; परंतु बुमराने मात्र विश्रांती घेतली. पहिल्या व दुसऱ्या कसोटी सामन्यातील वेगवान गोलंदाजांच्या अपयशामुळे जस्प्रीत बुमराहच्या जोडीला हर्षित राणाला संघात स्थान देण्यात येईल अशी चर्चा सुरू होती. पण सहाय्यक प्रशिक्षक अभिषेक नायर यांनी, अंतिम सामन्यातील संघात कोणताही बदल करण्यात येणार नाही, असे स्पष्ट सांगितले.

मालिकेत व्हाईटवॉश टाळण्यासाठी भारतीयांना हा सामना जिंकणे महत्त्वाचे आहे, त्यासाठी आज सर्व खेळाडू सरावासाठी उपस्थित होते. दुपारी एक ते चार असा तीन तास सराव केला. बुमराने गोलंदाजीचा सराव केला नाही; मात्र फलंदाजीचा नेटमध्ये काही काळ सराव केला. बुमराच्या वर्कलोडवर आम्ही लक्ष ठेवून आहोत. न्यूझीलंडविरुद्धच्या दोन्ही कसोटी सामन्यांत तीन दिवसांचा खेळ झालेला आहे, त्यामुळे प्रत्येकाला पुरेशी विश्रांती मिळालेली आहे, असे अभिषेक नायर यांनी सांगितले.

यशस्वी जयस्वालपासून ते केएल राहुलपर्यंत सर्व प्रमुख फलंदाजांनी नेटमध्ये सराव केला. अश्विन आणि जडेजा तर सुरुवातीपासून सरावात गुंतले होते; परंतु फिरकी माऱ्यासमोर एकाही फलंदाजाने स्वीप किंवा रिव्हर्स स्वीपचा वापर केला नाही. हे दोन फटके फिरकीला नामोहरम करण्यासाठी उपयुक्त असल्याचे सांगितले जाते.

विराट कोहलीने जडेजा आणि अश्विनसमोर अधिक सराव केला. कारण विराट दोन कसोटीतील तीन डावांत फिरकीसमोर बाद झालेला आहे.

रोहित शर्मा आज सरावात मोजकेच चेंडू खेळला; मात्र यशस्वी जयस्वालने सुरुवातीला आणि सराव संपता संपता दोन वेळा बॅटिंग केली.

नेटमधील सरावातील फलंदाजांची क्रमवारी पाहता अंतिम संघात फलंदाजांमध्ये बदल होण्याची शक्यता कमी आहे.