भारताचे दोन्ही संघ अंतिम फेरीत

मुंबई - भारताच्या पुरुष; तसेच महिला हॉकी संघाने ऑलिंपिक चाचणी हॉकी स्पर्धेच्या अंतिम फेरीत प्रवेश केला. मनदीपसिंगच्या हॅटट्रिकच्या जोरावर भारताने यजमान जपानला ६-३ असे हरवून अंतिम फेरी गाठली; तर महिला संघाने चीनविरुद्धची लढत बरोबरीत सोडवत प्राथमिक साखळीत अव्वल क्रमांक मिळवला. महिला संघासमोर निर्णायक लढतीत यजमान जपानचे आव्हान असेल. ही स्पर्धा टोकियोमध्ये सुरू आहे. 

पुरुष संघाने जपानविरुद्धच्या साखळी लढतीचा निकाल विश्रांतीपूर्वीच निश्‍चित केला होता. याच कालावधीत मनदीपने हॅटट्रिक केली आणि भारताने पहिल्या दोन सत्रांतच पाच गोल करीत ५-१ आघाडी घेतली होती. मनदीपला नीलकांता  शर्मा, नीलम संजीव आणि गुरजांत सिंगच्या एका गोलची साथ लाभली होती. आशियाई क्रीडा विजेत्या जपानविरुद्ध भारताने सुरवातीपासून आक्रमक खेळ केला आणि कधीही पकड गमावली नाही. विश्रांतीनंतर जपान जास्त आक्रमक होते; पण भारतीयांनी त्यांना जास्त संधी दिली नाही. 

सविताच्या अप्रतिम गोलरक्षणामुळेच भारतास चीनविरुद्धची लढत गोलशून्य बरोबरीत सोडवता आली. भारताची आक्रमणे वेगवान होती; तर चीनची प्रतिआक्रमणे जास्त योजनाबद्ध होती. चीनने प्रसंगी गोलक्षेत्रात जास्त हुकमतही राखली; पण सविताला चकवणे त्यांना जमले नाही. तिच्या भक्कम बचावाने सहकारी खेळाडूंना प्रेरणा मिळाली. त्यामुळे आक्रमणात संधी साधण्यात अपयश आल्यावरही भारतास हार टाळता आली आणि अंतिम फेरीही निश्‍चित झाली.