IPL : बेजबाबदार फलंदाजी मुंबईच्या मुळावर

चेन्नई - फलंदाजीतील अफलातून कामगिरीमुळे गेल्या दोन सामन्यांत शानदार विजय मिळवणाऱ्या मुंबईच्या फलंदाजीची गाडी मात्र रुळावरून घसरली. केवळ १३९ धावाच त्यांना करता आल्या आणि चेन्नईने हा सामना जिंकत सहा विकेटने एकतर्फी विजय मिळवला.

भरभक्कम फलंदाजी हा मुंबईचा गड आहे; पण चेन्नईच्या गोलंदाजांनी विकेट काढण्यापेक्षा मुंबईच्या फलंदाजांनी स्वतःच खराब फटके मारून आपला बुरुज ढासळू दिला. नेहाल वधेरा या नवख्या फलंदाजाने अर्धशतक केले, त्या वेळी इतर नामांकित फलंदाजांनी शरणागती स्वीकारली.

रोहितचा दुसरा भोपळा

मुळात मुंबई संघ व्यवस्थापनाने क्रमवारीत बदल करून घडी विस्कटली. रोहित शर्माऐवजी कॅमेरून ग्रीनला सलामीला पाठवले तो तेथे सहाच धावा करू शकला, तर तिसऱ्या क्रमांकावर फलंदाजी करणारा रोहित सलग दुसऱ्या सामन्यात शून्यावर बाद झाला. ईशान किशनही विकेट बहाल करून परतल्यामुळे मुंबईची अवस्था पहिल्या १७ चेंडूत ३ बाद १४ अशी झाली. तेथेच मुंबईला मोठ्या धावसंख्येसाठी कष्ट करावे लागणार, हे निश्चित झाले.

नेहाल वधेराला सूर्यकुमारऐवजी बढती देण्यात आली. तो एका बाजूने अर्धशतकी खेळी सजवत होता; परंतु सूर्यकुमार आणि यंदा प्रथमच संधी मिळालेल्या त्रिस्टन स्टब्स यांना प्रयत्न करूनही फटकेबाजी करता येत नव्हती.

फॉर्मात असलेल्या चेन्नई संघासाठी १४० धावांचे आव्हान कठीण नव्हते. त्यातच ऋतुराज गायकवाडने १६ चेंडूत ३० धावांची स्फोटक खेळी केली. डेव्हन कॉन्वेही आक्रमक फलंदाजी करत होता.

त्यामुळे दहा धावांच्या सरासरीने चेन्नईचा धावफलक धावत होता. या दोघांनंतर अजिंक्य रहाणे आणि अंबाती रायडू फारशी चमक दाखवू शकले नाहीत; मात्र मूळचा मुंबईकर फलंदाज शिवम दुबे मैदानात आला आणि त्याने षटकारांची बरसात करत मुंबईच्या उरल्यासुरल्या आशाही संपुष्टात आणल्या.

संक्षिप्त धावफलक :

मुंबई इंडियन्स ः २० षटकांत ८ बाद १३९ (ईशान किशन ७, कॅमेरुन ग्रीन ६, रोहित शर्मा ०, नेहाल वधेरा ६४ - ५१ चेंडू, ८ चौकार, १ षटकार, सूर्यकुमार यादव २६ - २२ चेंडू, ३ चौकार, त्रिस्तन स्टब्स २०, टीम डेव्हिड २, दीपक चहर ३-०-१८-२, तुषार देशपांडे ४-०-२६-२, मतिशा पथिराना ४-०-१५-३) पराभूत वि. चेन्नई सुपर किंग्स ः १७.४ षटकांत ४ बाद १४० (ऋतुराज गायकवाड ३० -१६ चेंडू, ४ चौकार, २ षटकार, डेव्हन कॉन्वे ४४ -४२ चेंडू, ४ चौकार, शिवम दुबे २६ -१८ चेंडू, ३ षटकार, पीयूष चावला ४-०-२५-२)