Australia Open: राफा इतिहास रचण्यापासून दोन पावले दूर

मेलबर्न : तब्बल २० वेळा ग्रँड स्लँम जिंकणाऱ्या राफेल नदालने (Rafael Nadal) ऑस्ट्रेलियन ओपनच्या (Australian Open 2022) उपांत्य पूर्व फेरीत कॅनडाच्या डेनिस शापोव्हालोव्हचा (Denis Shapovalov) कडवा प्रतिकार मोडून काढला. चार तास आठ मिनिटे चाललेल्या या लढतीत नदालने डॅनिसचा ६-३, ६-४, ४-६, ३-६, ६-३ अशा सेटमध्ये पराभव केला. याचबरोबर ऑस्ट्रेलियन ओपनच्या उपांत्य फेरीत (semi-final) धडक मारली. नदाल आता २१ व्या ग्रँड स्लॅम विजेतेपदापासून दोन पावलेच दूर आहे. जर नदालने ऑस्ट्रेलियन ओपन जिंकली तर तो २१ ग्रँड स्लॅम जिंकणारा इतिहासातील पहिला टेनिसपटू ठरले.

राफेल नदाल पहिल्यांदाच उपांत्यपूर्व फेरी खेळणाऱ्या डेनिस शापोव्हालोव्ह विरूद्ध सुरूवातीपासूनच आश्वासक वाटत होता. त्याने पहिला सेट ६-३ असा जिंकत धडाक्यात सुरूवात देखील केली. त्यानंतर ३ -३ अशा बरोबरीत असलेला दुसरा सेट राफेल नदालने ६ - ४ असा जिंकत सामन्यावरील आपली पकड आणखी मजबूत केली. आता राफेल नदाल उपांत्य फेरी गाठण्यापासून एक सेट दूर होता.

मात्र कॅनडाच्या डेनिसने झुंजार वृत्ती दाखवत तिसऱ्या सेटमध्ये ४-१ अशी आघाडी घेतली. पिछाडीवर पडेल्या नदालला या सेटमध्ये फारशी संधी न देता डेनिसने हा सेट ६-४ असा जिंकत नदालची विजयाची प्रतिक्षा अजून लांबवली. त्यानंतर चौथ्या सेटमध्ये देखील डेनिसने नदालला कडवी झुंज देत सेट ६ - ३ असा जिंकला. त्यामुळे नदालच्या पारड्यातील सामना आता समसमान पातळीव आला होता.

मात्र अनुभवी राफेल नदालने पाचव्या आणि निर्णायक सेटमध्ये पहिल्यापासूनच पकत मिळवत आपले कसब पणाला लावले. त्याने हा सेट ६-३ अशा फरकाने जिंकत आपले उपांत्य फेरीतील तिकिट निश्चित केले.