Nations League Football : इंग्लंडचा 1928 नंतर मायदेशातला मोठा पराभव

वॉल्वरहॅम्पटन : इंग्लंडला नेशन्स लीग फुटबॉल स्पर्धेत मायदेशात हंगेरीकडून 4 - 0 अशा मोठ्या पराभवला सामोरे जावे लागले. 1928 नंतरचा इंग्लंडचा हा मायदेशातील सर्वात मोठा पराभव आहे. गेल्या वर्षी युरोपियन चॅम्पियनशिपच्या अंतिम फेरीत धडक मारणाऱ्या इंग्लंडला हंगेरीकडून मानहानीकारक पराभव सहन करावा लागला. यामुळे इंग्लंडचे फुटबॉल चाहते संघावर चांगलेच भडकले. याचबरोबर युरोपियन चॅम्पियन इटलीसाठी देखील आजचा दिवस चांगला नव्हता. जर्मनीने त्यांचा 5 - 2 असा पराभव केला. (Nations League Football Hungary Give England His Biggest Defeat In Home After 1928)

पराभवानंतर इंग्लंडचा कर्णधार हॅरी केन म्हणाला, 'गेल्या काही वर्षातील ही आमची सर्वात मोठी हार आहे. हा पराभव विसरून आम्हाला पुढे जावे लागणार आहे.' आजच्या सामन्यात हंगेरीच्या रोलँड सलाईने 16 व्या मिनिटाला पहिला गोल केला. सलईने त्यानंतर 70 व्या मिनिटाला दुसरा गोल करत सामन्यात 2 - 0 अशी आघाडी घेतली.

त्यानंतर जसोल्टने तिसरा गोल केला तर डॅनियल गाजदैगने हंगेरीसाठी चौथा गोल करत इंग्लंडचा 4 - 0 असा पारभव केला. 94 वर्षापूर्वी इंग्लंडला मायदेशात स्कॉटलँडकडून 5 - 1 अशा मोठ्या फरकाने पराभव स्विकारावा लागला होता. यानंतर आज हंगेरीने इंग्लंडला त्यांच्यात देशात 4 - 0 अशी मात दिली.

दुसरीकडे इटली वर्ल्डकपमध्ये स्थान मिळवण्यात आलेले अपयश अजून पचवत आहे तोपर्यंतच जर्मनीने त्यांचा 5 - 2 असा दारूण पराभव करत त्यांच्या जखमेवर मीठ चोळले. जर्मनी एकवेळ 5 - 0 असा आघाडीवर होता. मात्र इटलीने नंतर दोन गोल करत आपला पराभव छोटा केला.