|
पनवेल - पार्थ पवार यांची उमेदवारी अद्याप जाहीर करण्यात आलेली नसून, कॉंग्रेस-राष्ट्रवादी कॉंग्रेसच्या यादीनुसार मावळ मतदारसंघात योग्य वेळी उमेदवार जाहीर करू, अशी माहिती पार्थ पवार यांच्या उमेदवारीबाबत विचारलेल्या प्रश्‍नावर माजी उपमुख्यमंत्री व राष्ट्रवादी कॉंग्रेसचे नेते अजित पवार यांनी बुधवारी दिली.
लोकसभेची घोषणा होताच पनवेल परिसरात नेत्यांच्या भेटीगाठी वाढल्या असून, शेतकरी कामगार पक्ष व कॉंग्रेसच्या नेत्यांशी आणि कार्यकर्त्यांशी संवाद साधण्यासाठी अजित पवार आज पनवेलमध्ये आले होते. कॉंग्रेस भवनात झालेल्या चर्चेत कॉंग्रेस व राष्ट्रवादीतील कार्यकर्त्यांनी जातीयवादी पक्षाविरोधात एकत्र येत आपापसातील हेवेदावे विसरून काम करण्याचे आवाहन त्यांनी केले. यानंतर शेकाप कार्यकर्त्यांच्या मेळाव्यात शेतकरी कामगार पक्ष शब्दाला जागणारा पक्ष असल्याचा उल्लेख करतानाच जातीयवादी पक्षाला पराभूत करण्याच्या हेतूने लोकसभा निवडणूक एकत्र लढविण्याचा निर्णय घेण्यात आल्याचे अजित पवार यांनी सांगितले.
"कोणत्याही पक्षाला शब्द दिलेला नाही'
विधानसभेच्या उमेदवारीबाबत कोणत्याही पक्षाला शब्द दिला नसल्याचे पवार यांनी या वेळी सांगितले. या वेळी मोदी सरकारवर टीका करताना सरकारने केलेल्या नोटाबंदीमुळे बेरोजगारी वाढल्याची टीका पवार यांनी केली. "हम करे सो कायदा', हुकूमशाही, एकाधिकारशाही खपवून घेतली जाणार नाही, असे सांगतानाच संरक्षण विभागाची फाईल गहाळ होऊ शकणार नाही, असा दावाही पवार यांनी केला.
|
