Loksabha 2019 :  भाजपच्या साथीसाठी बारणे मुंबईत 

पिंपरी - मावळ लोकसभा मतदारसंघातील शिवसेनेचे उमेदवार श्रीरंग बारणे यांचा प्रचार व ‘युती धर्म’ यापासून शहर भारतीय जनता पक्ष अद्याप अलिप्त आहे. प्रत्यक्ष मतदानाला अवघे २८ दिवस बाकी असल्याने बारणे यांना भाजपची सक्रिय साथ हवी आहे. त्याबाबत पक्षश्रेष्ठींना साकडे घालण्यासाठी नियोजित प्रचार दौरे रद्द करून त्यांनी सोमवारी (ता. १) मुंबई गाठली. 

लोकसभा निवडणुकीसाठी भाजप आणि शिवसेना यांच्यात युती झाली आहे. जागावाटपात मावळ मतदारसंघ शिवसेनेच्या वाट्याला आला आहे. त्यामुळे खासदारकीसाठी इच्छुक असलेले भाजपचे शहराध्यक्ष व आमदार लक्ष्मण जगताप यांच्या इच्छेवर पाणी फिरले. उलट राजकारणात कट्टर विरोधक व शिवसेनेचे उमेदवार श्रीरंग बारणे यांचा प्रचार करण्याची वेळ त्यांच्यावर आली. मात्र, जगताप यांनी अद्याप ‘आपले पत्ते’ खुले केलेले नाहीत. प्रचारात सक्रिय होण्याबाबत खुद्द बारणे यांनी दोन दिवसांपूर्वी त्यांची भेट घेतली. शिवसेनेच्या उपनेत्या डॉ. नीलम गोऱ्हे आणि खासदार संजय राऊत यांनी वेगवेगळ्या ठिकाणी स्वतंत्रपणे चर्चा करून जगताप यांचे मन वळवण्याचा प्रयत्न केला. तरीही ते व भाजप कार्यकर्ते प्रचारात सक्रिय झाले नाहीत. मात्र, पक्ष कार्यालयात प्रचार साहित्य दाखल झाले आहे. त्यात पक्षाचे झेंडे, बिल्ले, फलक यांचा समावेश आहे. मग, अडले कुठे? असा प्रश्‍न निर्माण झाला आहे. या दोघांत समेट घडवून आणण्यासाठी महसूलमंत्री चंद्रकांत पाटील व नीलम गोऱ्हे यांच्यात आठवड्यात पुन्हा बैठक होणार असल्याचे सांगितले जात आहे.