Loksabha 2019 : निवडणुकीत झालं रे बॉ गुलाबी नोटीचं दर्शन!

नोटाबंदीनंतर जवळपास बेपत्ता झालेल्या दोन हजाराच्या नोटा पुन्हा झळकल्या 

अकोला - ‘निवडणुकीत झालं रे बॉ गुलाबी नोटीचं फेर दर्शन... नोटाबंदीनंतर ती मोठी चर्चेत आली होती अन् पाहता पाहता गायबही झाली होती भाऊ. नंबर एकची नंबर दोन कधी झाली काही समजलंच नाही... पण निवडणुकीनं तिचं पुन्हा दर्शन घडोलं...’ असे डायलॉग सध्या अवतीभवती ऐकायला येत आहेत. या दशकातली सर्वांत मोठी परिणामकारक घटना ठरलेल्या नोटाबंदीच्यावेळी सर्वाधिक चर्चा झाली ती दोन हजाराच्या नोटीची... त्यावेळी तिचा तं जलवाच होता. कोणी म्हणे त्यात चिप आहे... कोणी म्हणे तिचा रंग जाते.... कोणी म्हणे काळ्या पैशावर उतारा हाय... जमिनीत खाली कितीही खोल दडवून ठेवली तरी ती सॅटेलाईटले सिग्नल पाठोते... काय काय कथा नाही ऐकल्या पण मध्यंतरी ती सर्वसामान्यांवर चांगलीच रुसली होती. अख्ख्या मार्केटमधून ती जणू गायबच झाली होती. पाचशेच्या नोटाईचं दर्शन होये पण दोन हजाराची काही दिसत नव्हती. दोन चार वेळा मन की बातं झाली. त्याप्रत्येकवेळी वाटे का आता दोन हजारचीही बंद करते का... पण तसं झालं नाही. अन् पुन्हा ती दिसली.

आता कशी दिसली म्हणून तिची चर्चा सुरू झाली. कोणी म्हणे काळा पैसा बाहेर निघाला तर कोणी काही आपल्याला तं बॉ तिच्या गुलाबी दर्शनानेच आनंद झाला. आता ती पुन्हा गायब होत आहे... आता ती पुन्हा तिजोरीत जाऊन बसते की काय....गायब झाली म्हणजे काळा पैशानं तिजोऱ्या भरल्या जात असल्याचं समजावं, असे काही ‘जाणकार’ म्हणून रायले रे बॉ... खरं खोटं तोच जाणे..!`