Loksabha 2019 : 56 इंचाच्या पंतप्रधानांना मनसेकडून 56 मार्कांची प्रश्नपत्रिका!

पुणे : पंतप्रधान नरेंद्र मोदी यांनी अनेक सभांमध्ये 56 इंचाच्या छातीचा उल्लेख केला. त्यांच्या याच वक्तव्यावरून महाराष्ट्र नवनिर्माण सेनेने पंतप्रधान मोदी आणि मुख्यमंत्री देवेंद्र फडणवीस यांना 56 मार्कांची प्रश्नपत्रिकाच प्रसिद्ध केली आहे. यामध्ये चौथ्या टप्पातील मतदानापूर्वी म्हणजे सोमवार (ता.29) दोन तासांचा अवधी दिला गेला आहे. 

मनसे अध्यक्ष राज ठाकरे यांच्याकडून लोकसभा निवडणुकीच्या पार्श्वभूमीवर पंतप्रधान मोदी, भाजपचे राष्ट्रीय अध्यक्ष अमित शहा आणि मुख्यमंत्री फडणवीस यांच्यावर सातत्याने टीका केली जात आहे. त्यानंतर आता मनसेकडून थेट प्रश्नपत्रिकाच प्रसिद्ध करण्यात आली आहे. या प्रश्नपत्रिकेत विविध प्रश्न विचारण्यात आले आहेत. यामध्ये 15 लाखांचे आश्वासन, कोणता नेता शेतकऱ्यांना 'साले' म्हणाले, यांसारखे विविध प्रश्न विचारण्यात आले आहे.

तसेच 200 ते 250 शब्दांत निबंधासाठी 'मी पुलवामामधील शहीद बोलतोय', 'चहावाला ते चौकीदार', 'विकास' वेडा झालाय आणि 'खोटे बोलणे' सवय की आजार अशा स्वरूपाचे प्रश्न यामध्ये विचारण्यात आले आहे.