Loksabha 2019 : स्टाईल आहे स्टाईल; उदयनराजेंची कॉलर शरद पवारांनी केली 'टाईट'

सातारा : मी जेव्हा बोलतो तेव्हा सगळ्यांचा पाठिंबा असल्याशिवाय बोलत नाही. मला सगळ्यात जास्त पाठिंबा पवारसाहेबांचा आहे. रामराजे निंबाळकर यांचा तर मला कॉलेजच्या काळापासून पाठिंबा आहे. मी आतापर्यंत अन्याय सहन केलेला नाही आणि यापुढे सहन करणार नाही. एक बार जो मैने कमेंटमेंट कर दी, तो मै अपनी खुद की भी नही सुनता, स्टाईल आहे स्टाईल असे म्हणत साताऱ्याचे खासदार उदयनराजे भोसले यांनी आपली कॉलर उडवली.

काँग्रेस व राष्ट्रवादी काँग्रेस आणि मित्रपक्षाचे सातारा लोकसभेचे उमेदवार खासदार उदयनराजे भोसले यांच्या प्रचाराचा प्रारंभ आज (रविवारी) कऱ्हाडात सभा झाली. यावेळी खासदार शरद पवार, विधान परिषेदचे सभापती रामराजे नाईक निंबाळकर, खासदार राजू शेट्टी, प्रदेशाध्यक्ष जयंत पाटील, माजी राज्यपाल श्रीनिवास पाटील, जोगेंद्र कवाडे, हसन मुश्रिफ, विक्रमसिंह पाटणकर, शिवेंद्रसिंहराजे भोसले, शशिकांत शिंदे, मकरंद पाटील, बाळासाहेब पाटील, जयकुमार गोरे, आनंदराव पाटील, सुमन पाटील, प्रभाकर घार्गे, इंद्रजित मोहिते, सत्यजित पाटणकर, देवराज पाटील आदी उपस्थित होते. 

उदयनराजे यांनी आपल्या भाषणाच्या अखेरीला चित्रपटातील संवाद म्हणत एकप्रकारे विरोधकांना टोला लगाविला. यावेळी उदयनराजे जागेवर बसल्यानंतर शरद पवारांनी यांनी त्यांची पाठ थोपटत पुन्हा एकदा त्यांची कॉलर टाईट केली.