Loksabha 2019 : 'आम्ही राहुल गांधींचा पराभव करू'

तिरुअनंतपुरम : राहुल गांधी यांनी भाजपला नाही तर डाव्यांना पराभूत करण्यासाठीच वायनाडमधून लढण्याचा निर्णय घेतला आहे. आता त्यांचा सामना थेट आमच्याशीच होणार आहे. त्यामुळे आम्ही त्यांना वायनाडमधून पराभूत करू, असा इशाराच केरळचे मुख्यमंत्री पी. विजयन यांनी आज (रविवार) दिला.

काँग्रेसचे अध्यक्ष राहुल गांधी केरळच्या वायनाडमधून लोकसभा निवडणूक लढवणार असल्याची घोषणा ज्येष्ठ नेते ए. के. अँटनी यांनी केली. त्यांच्या या घोषणेनंतर डाव्यांनी आक्रमक पवित्रा घेतला आहे. त्यावर आता विजयन यांनी सांगितले, की भाजपला सत्तेतून खाली खेचण्याचे भासवत राहुल गांधी यांनी स्वत:ची उमेदवारी देऊन त्यांचा खरा चेहरा उघड केला आहे. तसेच केरळमधील लोकसभेच्या 20 जागांपैकी काँग्रेस एकाच जागेवर निवडणूक लढवत आहे, त्यामुळे याकडे कोणतेही दुर्लक्ष करता येणार नाही.

दरम्यान, केरळमध्ये जिथे भाजपचा उमेदवार असेल तिथेच राहुल गांधी यांनी निवडणूक लढवायची होती. मात्र, त्यांनी असे न करता वायनाडमधून निवडणूक लढविण्याचे ठरवले आहे. त्यामुळे त्यांचा हा सामना डाव्यांविरोधात असल्याचे स्पष्ट होत आहे, असे विजयन म्हणाले.