आसनगाव-कसारादरम्यान स्पेशल पॉवर ब्लॉक 

मुंबई : मध्य रेल्वेवरील आसनगाव ते कसारा स्थानकांदरम्यान काही तांत्रिक कामे करण्यात येणार आहेत. रविवारी 10 नोव्हेंबर आणि 17 नोव्हेंबर या दोन दिवशी अप-डाऊन मार्गावर सकाळी 11 ते दुपारी 1 वाजेपर्यंत ब्लॉक घेण्यात येणार आहे. परिणामी वाहतुकीमध्ये काही बदल करण्यात आले आहेत. 

ब्लॉकदरम्यान 11055 एलटीटी-गोरखपूर एक्‍स्प्रेस आसनगाव स्थानकात 12.20 ते दुपारी 1 वाजेपर्यंत, 12542 एलटीटी-गोरखपूर एक्‍स्प्रेस वाशिंद स्थानकात दु. 12.25 ते दुपारी 1 वाजेपर्यंत, 12869 सीएसएमटी-हावडा एक्‍स्प्रेस खडवली स्थानकात दु.12.26 ते दु.1 वाजेपर्यंत थांबविण्यात येणार आहे. 12812 हटिया-एलटीटी एक्‍स्प्रेस कसारा स्थानकात स.11.34 ते दु.1 वाजेपर्यंत थांबविण्यात येणार असल्यामुळे एलटीटीला दुपारी 3 वाजता पोहोचणार आहे.

11094 वाराणसी-सीएसएमटी महानगरी एक्‍स्प्रेस इगतपुरी स्थानकात स.11 ते दु.12.30 वाजेपर्यंत थांबवून दादर स्थानकापर्यंतच धावणार आहे. तर 12294 अलाहाबाद-एलटीटी दुरान्तो एक्‍स्प्रेस आणि 12142 पालटलीपुत्र-एलटीटी एक्‍स्प्रेस एलटीटीला आपल्या निर्धारित वेळेपेक्षा 5 ते 15 मिनिटे उशिराने पोहोचणार आहेत. 12117-19 एलटीटी-मनमाड-एलटीटी एक्‍स्प्रेस रद्द करण्यात आली आहे. 

उपनगरीय मार्गावरील सीएसएमटी-कसारा ही स.9.41 ची लोकल आसनगावपर्यंतच धावणार आहे, तर कसारा-सीएसएमटी ही स.11.12 ची लोकल आसनगाव स्थानकातून स.11.49 ला चालविण्यात येणार आहे. कसारा-सीएसएमटी दु.12.19 ची लोकल रद्द केलेली आहे. प्रवाशांच्या सोयीसाठी आसनगाव-सीएसएमटी स्पेशल लोकल दु.12.27 वाजता सुटणार आहे.