गुन्हेपीडितांना मिळणार भरपाई; 2 ऑक्‍टोबरपासून नवी योजना 

सोलापूर : बलात्कारासह अन्य लैंगिक अत्याचार, जिवंत जाळण्याचे प्रकार आणि अॅसिड हल्ला अशा गुन्ह्यांमधील पीडित व्यक्‍तींना सरकारकडून ठरावीक रक्‍कम भरपाई म्हणून दिली जाणार आहे. त्यासाठी प्रत्येक राज्य स्वतंत्र निधी स्थापन करणार आहे. 2 ऑक्‍टोबरपासून या नव्या योजनेची अंमलबजावणी केली जाणार आहे. 

गुन्ह्यातील स्त्री-पुरुष अशा दोघांही गुन्हेपीडितांसाठी ही योजना राबविली जाणार आहे. त्यात दिल्या जाणाऱ्या भरपाईच्या रकमेला कोणतीही कमाल मर्यादा असणार नाही. सरकार भरपाई योजना व त्याबाबतची नवी नियमावली तयार करत नाही, तोपर्यंत ही योजना लागू असणार आहे. त्या प्रकारचे आदेश सर्वोच्च न्यायालयाने यापूर्वीच सर्व राज्यांना सूचित केले आहे. दिल्लीतील निर्भया अत्याचार व हत्याकांडानंतर अशा भरपाईचा विषय न्यायालयासमोर आला होता. त्यानंतर न्यायालयाच्या निर्देशानुसार ही योजना 2 ऑक्‍टोबरपासून सुरू होणार आहे. सद्यस्थितीत वाढत असलेल्या महिलांवरील अत्याचार प्रकरणामुळे राज्य सरकारला या योजनेसाठी मोठा निधी उभारावा लागणार आहे. 

गुन्हानिहाय किमान भरपाई 
- लैंगिक अत्याचारातून मृत्यू : पाच लाख 
- सामूहिक अत्याचार : पाच लाख 
- अत्याचार - पाच लाख 
- अत्याचारामुळे गर्भारण : तीन लाख 
- अनैसर्गिक लैंगिक अत्याचार : चार लाख 
- ऍसिड हल्ल्याने विद्रुपता अथवा मृत्यू : सात लाख 
- हल्ल्यामुळे गर्भपात अथवा नपुंसकत्व : दोन लाख 
- जळितकांडात मृत्यू : सात लाख 

गुन्हे पीडितांवर मोफत उपचार व्हावेत अथवा त्यांच्या मृत्यूनंतर कुटुंबाला अर्थसाहाय्य मिळावे, या उद्देशाने सर्वोच्च न्यायालयाच्या आदेशानुसार ही नवी योजना सुरू होईल. त्याबाबत मंत्रिमंडळाची लवकरच बैठक होणार आहे. 

- विजयकुमार देशमुख, पालकमंत्री तथा आरोग्य राज्यमंत्री