शरद पवारांवरील ईडीच्या कारवाईवर मुख्यमंत्र्यांचे स्पष्टीकरण, म्हणाले...(व्हिडिओ)

नवी मुंबई : आम्ही सुडाचे राजकारण करीत नाही. ईडीचे कामकाज राज्य सरकारच्या अखत्यारीत येत नाही, त्यामुळे राज्य सरकार ईडीच्या कारवाईत हस्तक्षेप करणार नाही असे स्पष्टीकरण राज्याचे मुख्यमंत्री देवेंद्र फडणवीस यांनी आज (ता.25) नवी मुंबईत दिले. नवी मुंबईत एका खाजगी कार्यक्रमात फडणवीस उपस्थित होते. यादरम्यान पत्रकारांसोबत बोलताना फडणवीस यांनी ईडीच्या कारवाईबाबत सरकारची भूमिका स्पष्ट केली. 

राज्य शिखर बॅंकेच्या गैरव्यवहारातील बाबींविरोधात मुंबई उच्च न्यायालयात एक याचिका दाखल झाली आहे. याचिकेवर सुनावणी दरम्यान न्यायालयाने पोलिसांमध्ये गुन्हे दाखल करण्याचे आदेश दिले आहेत. मात्र यात शभंर कोटींपेक्षा जास्त रक्कमांचा गुन्हा असल्याने हे गुन्हे तपासण्याचे काम ईडीमार्फत केले जात आहेत. या प्रकरणी प्रथमदर्शनी दोषी आढळलेल्या एकुण 60 जणांवर गुन्हे दाखल करण्याचे निर्देश न्यायालयाने ईडीला दिले आहेत. त्यानुसार हे गुन्हे दाखल झाले आहेत. अशी माहिती देवेंद्र फडणवीस यांनी दिली.

ईडीचे कामकाज केंद्र सरकारतर्फे चालवले जाते. त्यामुळे या कामकाजात राज्य सरकारचा कुठेही हस्तक्षेप नाही, आम्ही सुडाचे राजकारण कधी केले नाही. येत्या निवडणूकीत महायुती बहुमताने निवडून येणार आहे, ही काळ्या दगडावरील रेष असताना आमच्यावर सुडाच्या राजकारणाचा होत असलेला आरोप चूकीचा असल्याचे स्पष्टीकरणही फडणवीस यांनी दिले. या प्रकरणी ज्यांच्यावर गुन्हे दाखल झाले आहेत. त्यांनी चौकशीला सहकार्य करावे. दोष सिद्ध झाले तर कारवाई होईल मात्र दोष सिद्ध झाले नाहीत सुटका होईल असे सूचक वक्तव्य फडणवीस यांनी केले.