Shivrajyabhishek Symbol : 'त्या' ऐतिहासिक तारखेला दुजाभाव, शिवराज्याभिषेकाचं बोधचिन्ह नव्यानं जाहीर करा - संभाजीराजे

कोल्हापूर : ३५० व्या शिवराज्याभिषेक (Shivrajyabhishek Sohala) दिनानिमित्त साकारलेल्या बोधचिन्हात (Shivrajyabhishek Symbol) तत्काळ बदल करून ६ जून तारखेचा ठळक व सन्मानपूर्वक उल्लेख करावा. शिवराज्याभिषेक या ऐतिहासिक घटनेच्या तारखेला शासनाकडून दुजाभाव मिळणे, हे विद्यमान राज्य सरकारच्या प्रतिष्ठेस दूषण लावणारे आहे.

तरी शासनाने सुधारित बोधचिन्ह नव्याने जाहीर करावे, अशी मागणी युवराज संभाजीराजे छत्रपती (Sambhajiraje Chhatrapati) यांनी मुख्यमंत्री एकनाथ शिंदे (Eknath Shinde) यांच्याकडे निवेदनाद्वारे केली आहे.

निवेदनात म्हटले आहे की, यंदा तारखेनुसार ६ जून व तिथीनुसार २ जूनला शिवछत्रपती महाराजांचा ३५० वा राज्याभिषेक दिन साजरा झाला. शासनाकडून तिथीनुसार होणारा दिन शासकीय सोहळा म्हणून साजरा केला होता. तसेच ६ जूनला होणाऱ्या सोहळ्यासही तिथीसाठी उपलब्ध केल्या जाणाऱ्या सर्व सुविधा लागू केल्या जातील, असे बैठकीत ठरले होते.

शासनाने परिपत्रक काढून ३५० व्या राज्याभिषेकाचे बोधचिन्ह तयार केले आहे. सर्व शासकीय कार्यक्रमात ते वापरण्याचा निर्णय जाहीर केला आहे. बोधचिन्हात श्री शिवछत्रपती महाराजांच्या प्रतिमेसह शिवकालीन राजचिन्हे दर्शवली आहेत. ३५० वे वर्ष दर्शविण्यासाठी स्वस्तिश्री राज्याभिषेक शके ३५० चा उल्लेख आहे. मात्र, दिन दर्शविण्यासाठी केवळ ज्येष्ठ शुद्ध त्रयोदशीचा उल्लेख केलेला आहे.

जागतिक पातळीपर्यंत पोचलेल्या ६ जून तारखेचा उल्लेख केलेला नाही. शासनाने यापूर्वी तिथीनुसार होणारी शिवजयंती तारखेनुसार साजरी करण्यास सुरुवात केली. यासाठी विशेष समिती गठित करून शिवजन्माची तारीख शोधून काढली. असे असताना शिवराज्याभिषेक या ऐतिहासिक घटनेच्या तारखेला शासनाकडून दुजाभाव मिळणे, हे विद्यमान राज्य सरकारच्या प्रतिष्ठेस दूषण लावणारे आहे, असंही त्यांनी नमूद केलं.