सत्तास्थापनेसाठी अद्याप कोणताही प्रस्ताव नाही - शरद पवार

नवी दिल्ली - एकीकडे ‘महाराष्ट्रात विरोधात बसण्याचा जनादेश मिळाला आहे,’ असे सांगताना ज्येष्ठ नेते शरद पवार ‘सरकार स्थापनेसाठी अद्याप कोणाकडून प्रस्ताव आलेला नाही आणि तशी कोणी चर्चाही केलेली नाही,’ अशा शब्दांत पर्याय खुले असल्याची संदिग्ध भाषा वापरून राज्यातील वर्तमान राजकीय अनिश्‍चितता आणखी वाढवली आहे. महाराष्ट्रातील वातावरण भाजपच्या विरोधात आहे, असे म्हणून पवार यांनी सत्ताधाऱ्यांना चिमटाही काढला आहे.

महाराष्ट्रातील सरकार स्थापनेवरून शिवसेना आणि भाजपमध्ये कलगीतुरा रंगला असताना शरद पवार यांनी आज काँग्रेस अध्यक्षा सोनिया गांधींची भेट घेतली. पत्रकार परिषदेवेळी त्यांच्यासमवेत प्रफुल्ल पटेल आणि अजित पवार हे नेतेदेखील उपस्थित होते. पवार म्हणाले, की निवडणूक निकालानंतर स्थानिक परिस्थितीबाबत काँग्रेस नेतृत्वाला कळविण्यासाठीची आजची भेट होती. या भेटीमध्ये सरकार स्थापनेबद्दल चर्चा झाली नाही. शिवसेना आणि भाजप दोघांना आपल्या नेतृत्वाखाली सरकार हवे आहे. त्यामुळे निर्माण झालेली स्थिती सोनिया गांधींच्या कानावर घातली. महाराष्ट्रातील राजकीय परिस्थितीबद्दल उद्या मुंबईत राष्ट्रवादी काँग्रेसच्या नेत्यांशी चर्चा करून पुन्हा सोनिया गांधींना भेटणार. 

ही भेट पर्यायी सरकार स्थापनेसाठी आहे काय यावर थेट बोलण्याचे पवार यांनी टाळले. मात्र, ‘महाराष्ट्रातील जनभावना भाजपच्या विरोधातील आहे’, अशी पुस्ती त्यांनी जोडली. एवढेच नव्हे तर शिवसेना आणि राष्ट्रवादी काँग्रेसच्या एकत्र येण्यावरही त्यांनी संदिग्धता कायम ठेवली. अशा पर्यायाला काँग्रेसचा पाठिंबा आहे काय, असे विचारले असता ‘शिवसेनेने आम्हाला हमी दिलेली नाही. त्यामुळे शिवसेनेतर्फे बोलण्याचा प्रश्‍नच येत नाही. सध्यातरी आमच्याकडे संख्याबळ नसून जनतेने आम्हाला विरोधात बसण्याचा जनादेश दिला आहे, परंतु पुढे काय होते हे आताच सांगता येणार नाही’, असे संदिग्ध विधानही पवार यांनी केले.