"वाडिया'ला 24 तासांत निधी देण्याचा आदेश 

मुंबई -  पुतळ्यांची उंची वाढवण्यासाठी राज्य सरकारकडे पैसे आहेत; मात्र आरोग्यसेवेसाठी नाहीत. पुतळे महत्त्वाचे आहेत की रुग्णालये, असा खडा सवाल गुरुवारी (ता. 16) मुंबई उच्च न्यायालयाने राज्य सरकार आणि मुंबई महापालिकेला केला. वाडिया रुग्णालय ट्रस्टला 24 तासांत निधी देण्याचा आदेशही खंडपीठाने दिला आहे. 

ताज्या बातम्यांसाठी डाऊनलोड करा ई-सकाळचे ऍप

लहान मुले आणि महिलांसाठी असलेल्या वाडिया रुग्णालयापुढे निधीची अडचण निर्माण झाली आहे, त्यामुळे व्यवस्थापनावर रुग्णालय बंद करण्याची नामुष्की आली आहे. याबाबत गुरुवारी न्या. सत्यरंजन धर्माधिकारी आणि न्या. रियाझ छागला यांच्या खंडपीठापुढे सुनावणी झाली. महापालिकेकडून वाडिया रुग्णालयाला 14 कोटी आणि सरकारकडून 24 कोटी रुपये मंजूर झाले असून, ही रक्कम तीन आठवड्यांत देण्यात येईल, अशी माहिती सरकारी वकील गिरीश गोडबोले यांनी दिली; मात्र खंडपीठाने असमाधान व्यक्त केले. 

डॉ. बाबासाहेब आंबेडकर यांच्या पुतळ्याची उंची वाढवण्यासाठी सरकारकडे पैसे आहेत. आंबेडकरांनी ज्या लोकांचे प्रतिनिधित्व केले त्यांचे काय? त्यांच्यासाठी चालवल्या जाणाऱ्या रुग्णालयांचे काय? असे सवाल खंडपीठाने केले. आजारातून बरे होण्यासाठी रुग्णालये उपयुक्त आहेत की पुतळे, अशी विचारणाही उच्च न्यायालयाने केली. 

याप्रकरणी शुक्रवारी (ता. 17) पुन्हा सुनावणी होणार असून, सर्व मंजूर निधी कधीपर्यंत दिला जाईल, याची माहिती राज्य सरकार देणार आहे. याचिकादार दीपेश सिरोया यांनी वाडिया ट्रस्टद्वारे चालणाऱ्या रुग्णालयांच्या अडचणींबाबत न्यायालयात जनहित याचिका केली आहे.