राज्यात पावसाचा जोर वाढण्याची शक्यता

पुणे -  मराठवाडा, छत्तीसगड ते बंगालचा उपसागर या भागात कमी दाबाचे क्षेत्र आहे. तर अरबी समुद्र, कोकण, गोवा या परिसरात चक्राकार वाऱ्यांची स्थिती आहे. यामुळे राज्यात पावसाचा जोर वाढणार आहे. शुक्रवारी सकाळी आठ वाजेपर्यंतच्या चोवीस तासांमध्ये कोकण आणि मध्य महाराष्ट्रात पावसाच्या जोरदार सरी कोसळल्या आहेत. महाबळेश्वर येथे राज्यातील  सर्वाधिक २७० मिलिमीटर पाऊस पडल्याची नोंद झाली आहे. मराठवाडा व विदर्भातही तुरळक ठिकाणी हलक्या सरी पडल्या.  

गेल्या आठवड्यापासून कोकण, मध्य महाराष्ट्र, खान्देश या भागात हवामान ढगाळ आहे. यामुळे कोकणात बहुतांशी भागात मुसळधार पाऊस पडत आहे. कोकणातील पोलादपूर येथे सर्वाधिक १९० मिलिमीटर पाऊस पडल्याची नोंद झाली आहे. तर जव्हार, तलासरी, महाड, मोखेडा, भिरा, मंडनगड, माथेरान, मानगाव, तला, कर्जत या ठिकाणी मुसळधार पाऊस पडला आहे. तर अनेक ठिकाणी हलका ते मध्यम स्वरूपाचा पाऊस पडला.