Sushma Andhare : सुषमा अंधारे प्रकरणात संजय राऊतांचं विधान, 'आमच्या पक्षात किमान सभ्यता...'

मुंबईः ठाकरे गटाच्या उपनेत्या सुषमा अंधारे यांच्यासोबत गैरवर्तन झाल्याचं बोललं जात आहे. ज्या बीडच्या जिल्हाप्रमुखाने हे कृत्य केलं त्यांनीच याबाबत स्पष्टीकरण दिलं आहे. तर सुषमा अंधारे यांनी मात्र असं काहीही झालं नसल्याचं म्हटलं आहे.

राज्यात शिवसेनेची (ठाकरे गट) महाप्रबोधन यात्रा सुरु आहे. शिवसेनेच्या उपनेत्या सुषमा अंधारे ह्या यात्रेचं नेतृत्व करत आहे. यात्रेचा समारोप बीड येथे होणार आहे. या कार्यक्रमासाठी संजय राऊत यांची उपस्थिती राहणार आहे. मात्र समारोपाच्या कार्यक्रमापूर्वीच सुषमा अंधारे यांच्याबाबत एक प्रकार घडला.

शिवसेनेचे बीडचे दुसरे जिल्हाप्रमुख आप्पासाहेब जाधव यांनी सुषमा अंधारे यांना मारहाण केल्याचं त्यांनी स्वतःच सांगितलं. दुसरीकडे सुषमा अंधारे यांनी मात्र आपल्यासोबत असं काहीही झालं नसल्याचं सांगितलं आहे. सुषमा अंधारे ह्या पैसे मागतात, पैशाच्या जोरावर पद वाटप करत आहेत, असा आरोप जाधव यांनी केला आहे.

याप्रकरणी संजय राऊत यांनी प्रतिक्रिया दिली आहे. ते म्हणाले की, महाप्रबोधन यात्रेचं नेतृत्व सुषमा अंधारे ह्या करत आहेत. क्षणाचाही विलंब न लावता त्यांच्यासोबत गैरवर्तन करणाऱ्यांची हकालपट्टी करण्यात आलेली आहे. पक्षप्रमुखांनी तात्काळ कारवाई करुन संबंधित पदाधिकाऱ्यांवर कारवाई केली आहे. शिवसेनेत ही किमान सभ्यता पाळली जाते, असं त्यांनी स्पष्ट केलं.