Sheetal Mhatre Video : "याचा मास्टरमाईंड कलानगरमध्ये आहे"; नितेश राणेंचं सूचक वक्तव्य

शिवसेना नेत्या शीतल म्हात्रे आणि आमदार प्रकाश सुर्वे यांचा एक व्हिडीओ सध्या सोशल मीडियावर चांगलाच व्हायरल होत आहे. या व्हिडीओमुळे राजकीय वातावरण तापलं असून आरोप प्रत्यारोपांना उधाण आलं आहे. या व्हिडीओचा मास्टरमाईंड कलानगरमध्ये असून मातोश्री नावाच्या पेजवरुन व्हिडीओ पोस्ट झाल्याचं नितेश राणेंनी म्हटलं आहे.

याबद्दल बोलताना भाजपा आमदार नितेश राणे म्हणाले, "शीतल म्हात्रे यांच्या व्हिडीओबाबत आज चर्चा झाली. मॉर्फ केलेल्या व्हिडीओबद्दल काही नावं समोर आली आहेत. मातोश्री नावाच्या पेजवरुन व्हिडीओ पोस्ट झाले आहेत. युवासेनेच्या दोन कार्यकर्त्यांनी हे केलं आहे. त्यांच्या मागे जो मास्टरमाईंड आहे तो कलानगरमध्ये आहे."

राणे पुढे म्हणाले, "यांच्या सोबत जे आहेत ते चांगले आणि सोडून गेले ते वाईट, असं त्यांना वाटतंय. खरंच मर्दानगी असेल तर समोर येऊन बोला. तुम्ही जर हा खेळ सुरू केला, तर आम्ही पण करू. पार्टीचे अनेक व्हिडीओ आमच्याकडे आहेत. कलानगरमध्ये बसून सध्या बदनामी सुरू आहे. या प्रकरणाची सखोल चौकशी झाली पाहिजे. शीतल म्हात्रेंची बदनामी झाली, त्याचा हिशोब द्यावा लागेल."

दरम्यान, या व्हायरल व्हिडीओप्रकरणी आदित्य ठाकरेंचे निकटवर्तीय आणि युवासेनेचे पदाधिकारी साईनाथ दुर्गे याला ताब्यात घेण्यात आलं आहे. साईनाथ दुर्गे आदित्य ठाकरे यांचे निकटवर्तीय आहेत. साईनाथ दुर्गे युवासेना सदस्य आहेत. शिवसेना युवासेना सोशल मीडियाची जबाबदारी साईनाथ दुर्गे यांच्यावर आहे.