पुणतांब्यात शेतकऱ्यांचा पेढे वाटून आनंद साजरा 

शिर्डी - शेतकऱ्यांसाठी सरसकट कर्जमाफीची घोषणा होताच शेतकरी संपाच्या राज्यव्यापी आंदोलनाचे सुरवातीचे केंद्र असलेल्या पुणतांब्यात कार्यकर्त्यांनी रविवारी पेढे वाटून व फटाके वाजवून आनंद साजरा केला. आंदोलनाची हाक देणारे नेते पुणतांब्याबाहेर असले, तरी त्यांच्या समर्थकांनी मोठा जल्लोष केला. शेतकऱ्यांच्या आजवरच्या सर्वांत मोठ्या कर्जमाफीच्या निर्णयात पुणतांब्याचा सिंहाचा वाटा होता. याचा अभिमान व कौतुक येथील शेतकऱ्यांच्या चेहऱ्यावर दिसत होते. 

दरम्यान, जिल्ह्यात ठिकठिकाणी शेतकऱ्यांनी पेढे वाटून आणि फटाके फोडून जल्लोष केला. पुणतांबे ग्रामपंचायत कार्यालयाजवळ शेतकऱ्यांनी फटाके वाजवून व गुलालाची उधळण करत जल्लोष केला. एकमेकांना पेढे भरवून आनंद व्यक्त केला. रेल्वे स्थानक रस्त्यावर शेतकऱ्यांनी फटाक्‍यांची आतषबाजी व गुलालाची उधळण करून कर्जमाफीच्या निर्णयाचे स्वागत केले. 

शेतकऱ्यांच्या संपाची हाक पुणतांब्यातून दिली. ती देशभर पोचली. त्याचे श्रेय पुणतांबे परिसरातील शेतकऱ्यांना आहे. हा शेतकरी एकजुटीचा विजय आहे. 
- डॉ. धनंजय धनवटे 

आम्हीही संपावर जाऊ शकतो, हे शेतकऱ्यांनी सिद्ध केले. यापुढे राज्यकर्ते कोणीही असोत, त्यांना शेतकऱ्यांच्या प्रश्‍नांकडे दुर्लक्ष करता येणार नाही. सरकारच्या निर्णयाचे स्वागत करतो. 
- धनंजय धोर्डे 

आम्ही मुख्यमंत्र्यांसमवेत चर्चा केली. त्या वेळी सत्तर टक्के मागण्या मान्य झाल्या होत्या. झाले गेले बाजूला ठेवू. कर्जमाफीच्या घोषणेचे आम्ही मनापासून स्वागत करतो. हा ऐतिहासिक निर्णय आहे. 
- धनंजय जाधव 

पुणतांब्यातून हे आंदोलन उभे राहिले. राज्यभर पसरले. शेतकऱ्यांना सरसकट कर्जमाफी देताना आता सरकारने नवे फाटे फोडू नयेत. शेतकऱ्यांचा अंत पाहू नये. 
- सुहास वहाडणे, शिवसेना नेते 

संपूर्ण कर्जमुक्‍तीसाठी हा लढा होता. आजच्या निर्णयात सातबारा कोरा होण्याची शक्‍यता नाही. कर्जमाफीचा एकरी किती व किती एकरापर्यंत लाभ मिळेल, हे स्पष्ट नाही. त्यात ट्रॅक्‍टरसह शेती अवजारे व पॉलिहाउसच्या कर्जाचा उल्लेख नाही. कर्जाचे पुनर्गठण केलेल्यांना फायदा मिळणार नाही. शेतमालाच्या संदर्भात विशेष निर्णय न झाल्याने भाव पडण्याची भीती आहे. त्यातून शेतकरी आत्महत्या थांबविण्यासाठी केलेली लढाई अर्धवट स्थितीत दिसते. त्यामुळे शेतकरी संघटना समाधानी नाही. लढा सुरूच ठेवणार आहोत. 
- अनिल घनवट, प्रदेशाध्यक्ष, शेतकरी संघटना