शिवसेनेत लवकरच खांदेपालट? 

मुंबई - राज्य सरकारमध्ये सहभागी होताना विधान परिषदेतील चार सदस्यांना कॅबिनेट मंत्री केल्यामुळे विधानसभेत निवडून आलेल्या आमदारांचा असंतोष वाढला आहे. या पार्श्वभूमीवर शिवसेना पक्षप्रमुख उद्धव ठाकरे काही दिवसांतच किमान तीन कॅबिनेट आणि दोन राज्यमंत्र्यांना नारळ देण्याची चर्चा शिवसेनेत सुरू आहे. 

राज्याच्या सत्तेत सहभागी होताना शिवसेनेच्या विधान परिषदेतील सुभाष देसाई, रामदास कदम, दिवाकर रावते आणि डॉ. दीपक सावंत यांना कॅबिनेट मंत्रिपदाची लॉटरी लागली. वास्तविक पाहता युती तुटल्यानंतर झालेल्या विधानसभा निवडणुकीत शिवसेनेचे 63 आमदार निवडून आले होते. यांच्यामधून अनेकांना मंत्रिपद मिळेल अशी शक्‍यता असताना शिवसेनेतील जुने नेते आणि शिवसेनाप्रमुख दिवंगत बाळासाहेब ठाकरे यांचे निकटचे सहकारी म्हणून ओळखले जाणाऱ्या चौघांचा मंत्रिमंडळात समावेश करण्यात आला; मात्र त्यामुळे निर्माण झालेला असंतोष आता उफाळून आला आहे. याबाबत शिवसेनेच्या आमदारांनी उद्धव ठाकरे यांच्याकडे तक्रारी केल्या असून, उद्या (ता. 6) मातोश्रीवर यासंदर्भात महत्त्वपूर्ण बैठक होत आहे. 

विधान परिषद सदस्य असलेल्या आणि कॅबिनेट मंत्री असलेल्या काही जणांना वगळण्यात येणार असून, विधान परिषदेतील फक्त एक कॅबिनेट आणि एक राज्यमंत्री असेल. मुंबई महापालिका निवडणुकीत महत्त्वाची भूमिका बजावणाऱ्या आमदाराची राज्यमंत्रिपदावर वर्णी लागेल. सध्याचे दोन विद्यमान राज्यमंत्री वगळण्यात येणार असून, मुंबईतील महापालिका सांभाळलेल्या एका नेत्याचा मंत्रिमंडळात समावेश होईल. विद्यमान जलसंपदा मंत्री विजय शिवतारे आणि संजय राठोड यांना कॅबिनेट मंत्री म्हणून बढती देण्यात येईल, असे सांगण्यात येते. 

कोल्हापूरला प्रतिनिधित्व? 
रत्नागिरी जिल्ह्यातील राजन साळवी किंवा सदानंद चव्हाण यांची राज्यमंत्रिपदावर वर्णी लागेल. कोल्हापूर जिल्ह्यात शिवसेनेचे सहा आमदार असल्याने कोल्हापूरला प्रतिनिधित्व मिळेल. मराठवाड्यात शिवसेनेची ताकद कायम राखण्यासाठी अर्जुन खोतकर मंत्रिमंडळात असले तरी त्यांच्या जोडीला नांदेड जिल्ह्यातील आमदाराला कॅबिनेट मंत्री करण्यात येणार असल्याची चर्चा सध्या शिवसेनेत सुरू आहे.