'बेटी भगाओ'ची भाजपची नवी घोषणा : संजय राऊत

मुंबई : बेटी बचाओ, बेटी पढाओनंतर आता भाजप नेते बेटी भगाओ अशी घोषणा देत आहेत. मुख्यमंत्री देवेंद्र फडणवीस त्या व्यासपीठावर गेले होते, त्यामुळे त्यांनी या प्रकरणी स्पष्टीकरण द्यावे, असे शिवसेना नेते संजय राऊत यांनी म्हटले आहे.

सोमवारी घाटकोपर येथे दहीहंडीमध्ये राम कदम यांनी मुक्ताफळं उधळल्यानंतर त्यांच्यावर चौफेर टीका होऊ लागली आहे. कदम म्हणाले, तुम्ही कोणत्याही कामासाठी भेटू शकता. साहेब, साहेब मी तिला प्रपोज केले, पण ती मला नाही म्हणते, प्लिज मदत करा. शंभर टक्के मदत करणार. आधी मी सांगेन की, तुम्ही तुमच्या आईवडिलांना घेऊन या. आई-वडील म्हणाले, की ही मुलगी मला पसंत आहे, तर तिला पळवून आणणार आणि तुम्हाला देणार. त्या मुलीला पळवून आणण्यास मी मदत करेन. त्यासाठी माझा फोन नंबर घ्या आणि संपर्क साधा, असे त्यांनी म्हटले होते. यावरून राज्यभर वादंग उठले असून, राम कदम यांच्यावर जोरदार टीका होत आहे.

संजय राऊत म्हणाले, की मुलींबद्दल भाजप आमदारांकडून असे वक्तव्य होत असेल तर त्यांनी निर्भयाबद्दल गाळलेले अश्रू खोटे होते. मुख्यमंत्र्यांनी महिलांबद्दल असे बेताल वक्तव्य राम कदमांवर कारवाई करावी. मराठी कलाकार व मुख्यमंत्री त्या मंचावर जाऊन आले आणि राम कदम असे महिलांबद्दल आक्षेपार्ह वक्तव्य करत आहेत.