स्वबळाचा निर्धार शिवसेनेला तारणार?

मुंबई - शिवसेनाप्रमुख बाळासाहेब ठाकरे यांच्या निधनानंतर शिवसेनेने राजकीय आखाड्यात अनेक आव्हानांचा सामना करीत आपले वर्चस्व आणि अस्तित्व कायम राखले आहे. आता लोकसभा आणि विधानसभेच्या निवडणुका एकत्र घेऊन शिवसेनेला कोंडीत पकडण्याचा डाव रचला जात आहे. अशा स्थितीत शिवसेना पक्षप्रमुख उद्धव ठाकरे यांच्या नेतृत्वाची कसोटी असून, त्यांचा स्वबळावर लढण्याचा निर्धार पक्षाला तारणार का, हा प्रश्‍न चर्चेचा आहे. 

युती करणारच नाही, असे उद्धव यांनी ठणकावून सांगितले आहे. स्वबळावर लढताना शिवसेनेसमोर भाजपच्या ‘साम-दाम-दंड’ नीतीचे मोठे आव्हान आहे. भाजप अध्यक्ष अमित शहा यांनी युती करा नाही, तर ‘पटक देंगे’ असा इशारा दिलाय. त्यांच्या राजकारणाची पद्धत आक्रमक आहे. शिवाय शिवसेनेच्या अनेक आमदार आणि विद्यमान खासदारांवर भाजप गळ टाकेल, असेही संकेत आहेत. अशा स्थितीत शिवसेना अभेद्य राखण्याचे आव्हान ठाकरेंसमोर आहे. शिवसेनेकडे उद्धव ठाकरे हे एकमेव प्रचाराचे केंद्रस्थान आहे. २८८ विधानसभा आणि ४८ लोकसभा मतदारसंघांत शिवसेनेच्या प्रचाराचा झंझावात निर्माण करण्यास मर्यादा आहेत. दुसरीकडे काँग्रेस-राष्ट्रवादी एकत्र लढणार असल्याने त्यांचे कडवे आव्हान असू शकते.
 
आक्रमकतेला उत्तर
भाजपच्या आक्रमक पवित्र्याला त्याच आक्रमकतेने प्रत्युत्तर देण्यात उद्धव ठाकरे यांनीदेखील कसूर केली नाही. ‘युतीचा कटोरा घेऊन कोणाच्याही दारात भीक मागायला जाणार नाही,’ ही गर्जना सार्थ ठरवण्यासाठी अनेक आव्हानांना त्यांना तोंड द्यावे लागणार आहे.

भाजपची आक्रमकता
राज्यात विरोधी पक्ष म्हणून २०१४ पर्यंत शिवसेनेचाच मान होता. पण २०१४ मधील अभूतपूर्व यशानंतर भाजपने शिवसेनेच्या वाघाला आव्हान दिले. भाजपचे स्थानिक नेते थेट ‘मातोश्री’चे नाव घेऊन टीका करू लागले. शिवसेनाचा श्‍वास असलेल्या मुंबई महापालिका निवडणुकीतही भाजपने मोठे आव्हान उभे केले. ज्या मुंबईत शिवसेनेच्या होर्डिंग्जवर भाजपच्या नेत्यांना कसेबसे स्थान मिळायचे, त्या अख्ख्या मुंबईमध्ये मुख्यमंत्री देवेंद्र फडणवीस यांचे ‘होय, हा माझा शब्द आहे,’ अशी भलीमोठी आणि मोक्‍याच्या ठिकाणी होर्डिंग्ज लागली.