Sanjay Raut : राऊतांनी फोटो ट्वीट केलेल्या पीडित मुलीसोबत काय घडलं? 

ठाकरे गटाचे खासदार संजय राऊत यांनी दोन दिवसांपूर्वी एका मुलीचा फोटो ट्वीट केला होता. या फोटोवरुन आता त्यांच्यावर बार्शीमध्ये गुन्हा दाखल झाला आहे. पण त्या पीडित मुलीसोबत नक्की काय घडलं होतं? जाणून घ्या...

बारावीचा पेपर देऊन घरी येणार्‍या मुलीला रस्त्यात अडवून दोन नराधमांनी तिच्यावर जबरदस्तीने अत्याचार केला होता. पीडित मुलगी पोलिसात गेल्यानंतर तिची वैद्यकीय तपासणी न करता पोलिसांनी तिला घरी पाठवले होते. दुसर्‍या दिवशी पुन्हा ती पोलिसांत गेली होती. त्या दिवशी तिच्या घरी जाऊन त्या दोघांनी जीवघेणा हल्ला केला होता. त्यानंतर पोलिसांनी संशयित आरोपींना अटक केली.

या प्रकरणात पोलिस महानिरीक्षक एस. बी. फुलारी यांच्या आदेशाने एका सहायक पोलिस निरीक्षकासह एक महिला पोलिस उपनिरीक्षक आणि दोन हवालदार यांना निलंबित करण्यात आले आहे.

या प्रकरणात पोलिस निरीक्षकांचा हलगर्जीपणा आहे का, याची पडताळणी उपअधीक्षक विशाल हिरे हे करीत आहेत. दरम्यान, राज्यातील कायदा व सुव्यवस्था कशी विस्कळीत झाली आहे, हे दाखवण्यासाठी संजय राऊत यांनी त्या अल्पवयीन पीडित मुलीचा हल्ला झाल्यानंतरचा फोटो ट्विट केला होता. त्यावरून हा गुन्हा दाखल झाला आहे.