'या' बड्या नेत्यांची मुलं पहिल्यांदाच विजयी| Election Results 2019

मुंबई : विधानसभा निवडणूकीचा निकाल हाती येऊ लागला असून, बड्या नेत्यांची मुले पहिल्यांदाच विजयी झाले आहेत. विधानसभेत मोठ्या संख्येने युवा चेहरे पाहायला मिळणार आहेत.

1) शिवसेनाप्रमुख बाळासाहेब ठाकरे, पक्षप्रमुख उद्धव ठाकरे यांनी कधीही निवडणूक लढवली नाही. मात्र, ठाकरे कुटुंबाच्या तिसऱ्या पिढीने निवडणूक लढवली आणि जिंकलीही. शिवसेनेसाठी मुंबईतला सर्वात सुरक्षित मतदारसंघ असलेल्या वरळी मतदारसंघातून आदित्य ठाकरेंनी विजय मिळवला आहे.

2) वांद्रे पूर्व मतदारसंघातून काँग्रेसचे झिशान सिद्दीकी यांनी शिवसेनेचे विश्वनाथ महाडेश्वर यांचा पराभव केला. बाबा सिद्दीकी यांचा मुलगा झिशान या विजयामुळे पहिल्यांदाच विधानसभेत पोहोचले आहेत.

3) लातूर ग्रामीण मतदारासंघाकडे राज्याचे लक्ष लागले होते. माजी मुख्यमंत्री विलासराव देशमुख यांचा मुलगा आणि आमदार अमित देशमुख यांचा भाऊ धीरज देशमुख या मतदारसंघात मैदानात होते. अमित आणि धीरज या दोन्ही भावांनी त्यांच्या मतदारसंघात विजय मिळवला. धीरज देशमुखांना पहिल्याच निवडणुकीत विजय मिळवण्यात यश आले आहे.

4) दापोली मतदारसंघातून योगेश कदम विजयी झाले. पर्यावरणमंत्री रामदास कदम यांचा मुलगा योगेशने राष्ट्रवादीच्या संजय कदम यांचा पराभव केला. योगेशने पहिल्यांदाच विजय मिळवताना राष्ट्रवादीच्या ताब्यातला मतदारसंघ खेचून आणला.

5) श्रीवर्धन मतदारसंघात राष्ट्रवादी काँग्रेसच्या आदिती तटकरे यांनी विजय मिळवला. लोकसभा निवडणुकीत आदिती तटकरे यांचे वडील सुनील तटकरेंनी विजय मिळवला होता. त्यामुळे आता वडील लोकसभेत आणि मुलगी विधानसभेत असे चित्र पाहायला मिळणार आहे.