बाळाच्या स्वागतासाठी सारेच उत्सुक

Uterus-implant
Uterus-implant

पुणे - प्रत्यारोपण केलेल्या गर्भाशयातून पुढील पंधरा दिवसांमध्ये देशातील पहिल्या बाळाचा पुण्यात जन्म होणार आहे. त्याच्या स्वागतासाठी आणि त्याची काळजी घेण्यासाठी वैद्यकीय यंत्रणा सज्ज होत आहे. गर्भाशयात वाढणाऱ्या या गर्भाचे वजन आता एक किलो ७०० ग्रॅम झाले असून, लवकरच सीझर करून प्रसूती करण्यात येणार आहे. 

देशातील पहिले गर्भाशय प्रत्यारोपण पुण्यातील गॅलॅक्‍सी केअर रुग्णालयात १७ मे २०१७ रोजी करण्यात आले. प्रत्यारोपित केलेल्या गर्भाशयातून जन्म घेणारे हे देशातील पहिले बाळ ठरणार आहे. जगभरामध्ये आतापर्यंत प्रत्यारोपित गर्भाशयातून ११ बाळांचा जन्म झाला आहे. त्यामुळे या पद्धतीने जगात येणारे हे १२ वे बाळ असेल. या पार्श्‍वभूमीवर बाळाच्या जन्माकडे आई-बाबांबरोबरच संपूर्ण वैद्यकीय जगताचे लक्ष लागले आहे. 

याबाबत गॅलॅक्‍सी केअर रुग्णालयाचे वैद्यकीय संचालक डॉ. शैलेश पुणतांबेकर म्हणाले, ‘‘रुग्णालयात आतापर्यंत तीन गर्भाशय प्रत्यारोपण करण्यात आले आहेत. त्यापैकी प्रत्यारोपित केलेल्या एका गर्भाशयात बाळाची व्यवस्थित वाढ होत आहे. प्रत्यारोपित केलेल्या गर्भाशयातून जगभरात ३० ते ३२ आठवड्यांमध्ये प्रसूती करण्यात आली आहे. त्याच दरम्यान, ही देखील प्रसूती करण्यात येईल.’’

नवजात अर्भक विभाग सज्ज
गॅलॅक्‍सी केअर रुग्णालयामध्ये होणाऱ्या या प्रसूतीनंतर नवजात अर्भकाला अद्ययावत वैद्यकीय सेवा मिळावी, यासाठी या रुग्णालयात नवजात अर्भक विभाग सज्ज करण्यात येत आहे. व्हेंटिलेटरपासून ते अत्यावश्‍यक औषधांपर्यंत सर्व अद्ययावत सुविधा या विभागात ठेवण्यात येत आहेत. 

आईनेच दान केलेले गर्भाशय तिच्या मुलामध्ये प्रत्यारोपित करण्यात आले. त्यामुळे ज्या गर्भाशयात ती वाढली, तिचा जन्म झाला त्यातून ‘ती आता तिच्या बाळाला जन्म देणार आहे. सरोगसी किंवा दत्तक हे दोन्ही उपलब्ध मार्ग नाकारून आपलं मुल असावे, हीच यामागील प्रखर इच्छा होती. याच इच्छाशक्तीच्या बळावर प्रत्यारोपित केलेल्या गर्भाशयातून देशातील पहिल्या बाळाचा जन्म होत आहे.
- डॉ. शैलेश पुणतांबेकर,  वैद्यकीय संचालक, गॅलॅक्‍सी केअर रुग्णालय

प्रयोगशाळेत वाढविलेला गर्भ प्रत्यारोपित केलेल्या गर्भाशयात सोडण्यात आला. त्यातून त्या मातेला गर्भधारणा झाली. प्रत्यारोपित गर्भाशयात गर्भधारणा करून आता ३१ आठवडे झाले आहेत. या दरम्यान गर्भाची वाढ व्यवस्थित झाली आहे. शेवटच्या दोन आठवड्यात गर्भाची वाढ, हृदयाचे ठोके अशा प्रत्येक गोष्टीची बारकाईने तपासणी करणार आहे. गर्भाचे वजन दोन किलो झाल्यानंतर प्रसूतीचा निर्णय घेतला जाईल.
- डॉ. मिलिंद तेलंग, स्त्रीरोग आणि प्रसूतितज्ज्ञ

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com