जॉनी डेपने जिंकला मानहानीचा खटला; एँबर हर्डला मोठा धक्का

हॉलिवूड स्टार जॉनी डेप आणि त्याची पूर्वपत्नी एँबर हर्ड यांच्यातला मानहानीचा खटला सध्या सुरू असून त्याची जोरदार चर्चा आहे. हा खटला जॉनी डेपने जिंकला आहे. त्यामुळे आता एँबरला १५ मिलियन डॉलर्सची नुकसान भरपाई जॉनी डेपला द्यावी लागणार आहे. प्रचंड गोंधळ, अनेक पुरावे, साक्षी आणि तासन् तास चाललेल्या सुनावणीनंतर सात न्यायाधीशांच्या खंडपीठाने हा निकाल दिला आहे. (Johnny Depp Vs Amber Heard)

न्यायाधीशांनी एँबरसोबत जॉनी डेपलाही (Johnny Depp) मानहानीच्या काही प्रकरणांमध्ये दोषी ठरवलं आहे. त्यालाही एँबरला २ मिलियन डॉलर्सची नुकसान भरपाई द्यावी लागणार आहे. सात सदस्यीय न्यायाधीशांना अंतिम निर्णय देण्याआधी तीन दिवस विचार विमर्श केला.

न्यायाधीशांनी निर्णय दिल्यानंतर जॉनी डेपच्या चाहत्यांमध्ये आनंदाचं वातावरण आहे. त्याचे चाहते न्यायालयाच्या बाहेर मोठ्या संख्येने एकत्र आले होते. जॉनी डेप आणि एँबर हर्ड (Amber Heard) या दोघांमधला हायप्रोफाईल खटला २०१८ मधल्या एका लेखापासून सुरू झाला. जॉनी डेपची पूर्वपत्नी एँबरने २०१८ मध्ये एका वर्तमानपत्रात लेख लिहिला होता, त्यात तिने आपण घरगुती हिंसाचाराचा बळी ठरल्याचा उल्लेख केला होता. हा लेख प्रकाशित झाल्यानंतर जॉनी डेपने तिच्यावर मानहानीचा खटला दाखल केला होता.