राजकारण आणि कला क्षेत्राचे असलेले परस्परांशी असलेले आपुलकीचे नाते उघड आहे. अनेक राजकीय कार्यक्रमात कलाकार हजेरी लावतात तर अनेक सांस्कृतिक कार्यक्रमांना राजकीय नेते उपस्थित असतात. अनेक राजकीय नेत्यांची मुले कला क्षेत्रात पाय रोवण्यासाठी धडपडत असतात. माजी मुख्यमंत्री आणि दिवंगत नेते विलासराव देशमुख यांचा मुलगाही अभिनय क्षेत्रात आला. विशेष म्हणजे त्याने अथक परिश्रमाने मनोरंजन क्षेत्रात आपली ओळख निर्माण केली. अशी छाप उमटवणारे रितेश सारखे क्वचितच असतात. असाच प्रयत्न आणखी एका राजकीय नेत्याचा मुलगा करतो आहे.
प्रेमाची नवी भाषा, नवी कथा घेऊन ‘तू आणि मी, मी आणि तू’ चित्रपट लवकरच आपल्या भेटीला येणार आहे. या चित्रपटातून अभिनेता सोहम चाकणकर चित्रपटसृष्टीत पदार्पण करणार आहे. सोहम चाकणकर हा राष्ट्रवादीच्या नेत्या आणि राज्य महिला आयोगाच्या अध्यक्षा रुपाली चाकणकर यांचा मुलगा आहे. महिलांवरील अन्याय अत्याचारावर आवाज उठवून त्यांच्या न्यायासाठी उभ्या राहणाऱ्या रुपाली चाकणकर यांचा मुलगा आता अभिनेता म्हणून नवी ओळख मिळवणार आहे.
या चित्रपटाची कथा रोमँटिक असून सोहम या चित्रपटात गणेश नावाच्या समंजस, साध्या आणि होतकरू मुलाची भूमिका साकारणार आहे. शिवाय सोहमचा रोमँटिक अंदाजही या चित्रपटातून प्रेक्षकांना पाहायला मिळेल. सोहमसोबत या चित्रपटात आणखी कोणते कलाकार झळकणार हे मात्र अद्याप उघड झालेले नाही. “अभिनय क्षेत्रात येण्याची संधी देणारे चित्रपटाचे निर्माते सागर जैन आणि दिग्दर्शक कपिल जोंधळे यांनी दिलेलं प्रोत्साहन यासाठी सर्वप्रथम मी त्यांचे आभार मानतो. कपिल सरांनी घेतलेल्या वर्कशॉपमधून आणि त्यांनी केलेल्या मार्गदर्शनांमधून बरेच काही नव्याने शिकता आले. या क्षेत्रात मला बरीच उंची गाठायची आहे आणि त्यासाठी मी खूप मेहनत घेईन,'' अशी प्रतिक्रिया सोहमने दिली.
''आमच्या कुटुंबात कोणीही या क्षेत्रात नाही. सोहम वेगळं क्षेत्र निवडून त्यात कामगिरी करत आहे. हे पाहून खूप आनंद होतो. आमच्या शुभेच्छा आणि आशीर्वाद सोहमच्या मागे कायम आहेतच,'' अशा शब्दात रुपाली यांनी आपल्या मुलाला आर्शीवाद दिले आहेत. लवकरच हा चित्रपट प्रदर्शित होईल.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.