औरंगाबाद-पुणे महामार्गावर रास्ता रोको, कांदा निर्यात बंद केल्याने शेतकरी संतप्त

Farmers Rasta Roko Against Onion Export Ban
Farmers Rasta Roko Against Onion Export Ban

कायगाव(जि.औरंगाबाद) : केंद्र सरकारने कांदा निर्यातीवर बंदी घातल्याच्या विरोधात बुधवारी (ता.१६) जुने कायगाव (ता.गंगापूर) येथे कांदा उत्पादक शेतकऱ्यांनी रास्ता रोको आंदोलन केले. पंधरा मिनिटे चाललेल्या आंदोलनात शेतकऱ्यांनी आपल्या संतप्त भावना व्यक्त करत जोरदार घोषणा देत बंद केलेली निर्यात उठवावी, कांद्याला आणि इतर शेतीमालाला योग्य भाव द्यावा आदी मागण्यांबाबत गंगापूरचे तहसीलदार अविनाश शिंगटे यांना निवेदन दिले आहे.

केंद्राने कांदा निर्यात धोरणात बदल करत निर्यातबंदी केल्याने कांद्याचे भाव सोमवारी कोसळले आहे. त्यामुळे आधीच अडचणीत आलेला कांदा उत्पादक शेतकरी आणखी हतबल आला आहे. आता मिळणाऱ्या भावापासून कांद्याचे उत्पादन खर्चही पदरात पडण्याची शाश्‍वती नसल्याचे शेतकऱ्यांचे म्हणणे आहे. मागील सहा महिन्यांत कोरोनाच्या पार्श्वभूमीवर अगोदरच शेतकऱ्यांना मोठ्या आर्थिक संकटाला तोंड द्यावे लागले असून आता पुन्हा नवीन समस्या समोर उभी राहिली आहे.

निर्यातबंदी पूर्वी कांद्याला एक हजार ५०० ते दोन हजार भाव मिळत होता. मात्र आता कांदा दर आणखी खाली येण्याची भीती असल्याने शेतकरी हवालदिल झाल्याचे निवेदनात म्हटले आहे. या प्रश्नी सरकारचे लक्ष वेधण्यासाठी बुधवारी (ता.१६) सकाळी सव्वा अकरा ते साडेअकरा दरम्यान औरंगाबाद-पुणे महामार्गावर जुने कायगाव (ता.गंगापूर) येथील टी-पॉइंटवर शारीरिक अंतर राखत रास्ता रोको आंदोलन करण्यात आले.

यावेळी प्रहार शेतकरी संघटनेचे उपजिल्हा प्रमुख भाऊसाहेब शेळके, कृष्णा पाटील डोणगावकर, माजी सरपंच बाबासाहेब चव्हाण, शेतकरी नेते संपत रोडगे, संतोष गायकवाड, राहुल चव्हाण, सुबूर शेख, रामदास वाघ, गणेश खैरे, राधाकिसन औटे, सुरेश चव्हाण यांच्यासह शेतकरी उपस्थित होते. यावेळी पोलिस निरीक्षक एम. टी. सुरवसे व त्यांच्या पोलीस कर्मचारी यांनी चोख बंदोबस्त ठेवला होता.

संपादन - गणेश पिटेकर

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com