राज्यातून बारा हजार भाविक जाणार हजला

मराठवाड्यातील दोन हजार 953 जणांचा समावेश
औरंगाबाद - महाराष्ट्र राज्य हज समितीमार्फत या वर्षी राज्यातून 11 हजार 907 भाविक हजला जाणार असून, यामध्ये थेट नंबर लागलेल्या 70 वर्षांपेक्षा अधिक वयाच्या 2,254 भाविकांचा समावेश आहे. उर्वरित नऊ हजार 622 भाविकांचा सोडतीच्या माध्यमातून नंबर लागला आहे.
भाविकांना या वर्षी हजला जाताना छातीचा एक्‍स-रे आणि रक्ततपासणीचा सीबीसी रिपोर्ट अनिवार्य करण्यात आला आहे. शिवाय विमान प्रवास खर्चामधील जीएसटी 18 टक्‍क्‍यांवरून पाच टक्‍क्‍यांवर आणल्याने भाविकांना सात ते दहा हजार रुपयांपर्यंत कमी खर्च येईल.

या वर्षी राज्यभरातून 35 हजार 666 भाविकांनी अर्ज केले होते. यामध्ये 17 हजार 742 महिला, तर 17 हजार 960 पुरुषांचा समावेश आहे. त्यात मराठवाड्यातून दोन हजार 953 भाविकांचा हजसाठी नंबर लागला आहे. यामध्ये सर्वाधिक 891 भाविक औरंगाबाद जिल्ह्यातील आहेत; तर सर्वांत कमी 139 भाविक हिंगोली जिल्ह्यातील आहेत.

मराठवाड्यातील भाविकांना हजला जाण्यासाठी औरंगाबादेतील चिकलठाणा विमानतळावरून थेट विमानसेवा उपलब्ध आहे. गेल्या वर्षीपासून भाविकांना मुंबई किंवा औरंगाबाद विमानतळापैकी एकाची निवड करण्याची मुभा देण्यात आली आहे. औरंगाबाद विमानतळासाठी या वर्षी आतापर्यंत 821 भाविकांनी पसंती दिली आहे. जुलै महिन्यात मराठवाड्यातील भाविक हजला जातील, अशी शक्‍यता आहे.

सात ते दहा हजारांची बचत
हजला जाण्यासाठी विमान खर्चावरील जीएसटी पाच टक्‍के केल्याने भाविकांच्या सात ते दहा हजारांची बचत होईल. नंबर लागलेल्या भाविकांना 81 हजार रुपयांचा पहिला हप्ता ता. पाच फेब्रुवारीपर्यंत, तर एक लाख 20 हजारांचा दुसरा हप्ता 20 मार्चपर्यंत हज समितीच्या खात्यात जमा करावा लागेल.